Виржил ван Дейк Туркияга йўл олиши мумкин

"Ливерпуль" ҳамда Нидерландия терма жамоаси ҳимоячиси Виржил ван Дейк фаолиятини Туркия чемпионатида давом эттириши мумкин.

"Sporx" нашри тарқатган маълумотга кўра, 34 ёшли марказий ҳимоячига "Галатасарой" жиддий қизиқиш билдирмоқда. Истанбул гранди ёзги трансферлар ойнасида футболчини ўз сафига қўшиб олишга ҳаракат қилади.

Нидерландиялик футболчи 2018 йил январидан буён "Ливерпуль" шарафини ҳимоя қилиб келмоқда. Унинг клуб билан тузган амалдаги шартномаси 2027 йил ўрталарига қадар мўлжалланган.

Манбага кўра, ҳимоячининг трансфер қиймати ҳозирда 18 миллион евро атрофида баҳоланмоқда.

Жорий Англия Премьер-лигаси мавсумида ван Дейк 35 та учрашувда майдонга тушди. Ушбу баҳсларда ҳимоячи 4 та гол урди ва 4 марта сариқ карточка олди.