Виталий Левченко: "Биз ҳар бир ўйинда яхшироқ ва натижа учун ўйнаймиз"

Суперлиганинг 4-туридан ўрин олган “Нефтчи” – “Навбаҳор” (3:2) учрашувидан кейинги матбуот анжуманининг иккинчи қисмида мезбонлар бош мураббийи Виталий Левченко қатнашиб, журналистларнинг саволларига жавоб берди. 

“Нефтчи” устози одатдагидек, ўз сўзини ўйин ҳақидаги фикрлари билан бошлади.

- Дербининг қийин ўтишини олдиндан кутгандик ва амалда ҳам шундай бўлди. “Навбаҳор” яхши жамоа ва бугун шунга яраша муносиб ўйин кўрсата олди. Ҳисобда икки бор олдинга чиқиб олди. Лекин йигитлар ирода кўрсатишди ва 12-футболчимиз бўлган мухлисларга ғалабани тортиқ этишди. Ишқибозлар бундан хурсанд бўлишди, деб ўйлайман.

- Тома Табатадзе нима учун қайдномага киритилмаяпти? 

- Табатадзе сон қисмини шикастлаб олган. Айни пайтда у даволаниш жараёнини ўтказмоқда. Тахминан 7-10 кунларда у сафимизга қайтади ҳамда жамоамизга ёрдам беради. 

- Бугунги ўйинда захира алмаштиришлар ўзини оқлади, деган фикр тўғрими?

- Биз айнан керакли позицияларда алмаштиришларни амалга оширдик. Ўйинни кучайтириш, олдинги чизиқда босимни ошириш кераклигини тушуниб тургандик, чунки икки бор ҳисобда орқада қолдик. Биз ўз майдонимизда ўйнадик ва фақат ғалабани ўйладик. Майдонга тушган барча футболчилар борларини беришди. 

- Жамоа ўйинга бошқача тактикада тайёргарлик кўрмоқда, майдонга эса бошқа тактикада тушяпти. Бу рақибларга совғами?

- Йўқ, совға эмас. Рақиб бизни, биз уларни таҳлил қиламиз. Ҳужумда кўпроқ футболчиларимиз ўйнашмоқда, лекин ҳимояни ҳам унутмаслик керак. Бугун ўз дарвозамиздан 2 та тўп ўтказиб юбордик. Иккинчи гол хатомиздан сўнг урилди. Узун пасдан кейин бу юзага келди. Биз ҳар бир ўйинда яхшироқ ва натижа учун тўп тепамиз. 

- Кубок ва чемпионат баҳсларида жамоа олдига қандай мақсад қўйилган?

- Чемпионат ёки кубок деб ажратмаймиз. Ҳар бир жамоа учун ушбу мусобақалар муҳим ҳисобланади. Ҳозирда футболчилардан ким кучли бўлса, ўша майдонга тушади, биз вазиятдан келиб чиқиб, ротация қиламиз. Биз иккита турнирда ўйнаймиз.

- Наманганда кечадиган кубок учрашувида ҳам шу таркибдан фойдаланасизми?

- У ўйингача ҳали вақт бор. Унгача “Машъал” билан ўйнаймиз. Ҳозирда тикланишимиз муҳим, чунки футболчилар бугун кўп куч сарфлашди. Ўшанда ўйинчиларнинг жисмоний ҳолатларига қараймиз. Ҳамма жамоалар таркибга маҳоратли футболчиларни қўшиб оляпти. Ўткинчи ўйинлар йўқ. Ҳар бир жамоа очко олишга астойдил ҳаракат қилмоқда. 

- Сизнингча чемпионлик учун қайси жамоаларда имконият юқори?

- Ҳозирча чемпионат бошланишида бу ҳақда гапириш қийин. Ҳеч ким кутмаган жамоалар юқорида, фаворитлар ўзининг ўрнида эмас. 6-7 турдан сўнг, жамоаларнинг ҳолатига қараб, бу ҳақда хулоса қилиш мумкин.