Волкановски Австралия ОАВларидан норози
UFC чемпионининг айтишича, улар етарлича эътибор қаратмаяпти
Ярим енгил вазнда UFC чемпиони Александр Волкановски ўз ютуқлари Австралиянинг энг буюк спортчилари қаторида эътироф этилиши кераклигини таъкидлади. Унинг айтишича, мухлислардан катта меҳр кўраётганига қарамай, мамлакатнинг айрим йирик ОАВлари унга етарлича эътибор қаратмаяпти.
"Менинг ютуқларим энг буюк спортчиларники билан бир қаторда туриши керак деб ҳисоблайманми? Ҳа, албатта. Кўпчилик бу спорт туридан узоқроқ юришга ҳаракат қилади. Лекин оддий одамлар эмас. Мен мухлислардан жуда катта меҳр кўраман. Буни одамларнинг олдимга келиб суҳбатлашиши ва қўллаб-қувватлаши орқали ҳам сезиш мумкин. Менимча, биз бошқа машҳур австралиялик спортчилар билан бир қаторда бўлишга муносибмиз.
Мени бироз ранжитадиган жиҳати шуки, айрим йирик ОАВлар буни ҳеч қачон кўрсатишга уринмайди. Балки улар буни тушунмас. Лекин мен бундан хафа бўламан. Чунки одамлар нимани кўришни хоҳлашини яхши биламан, аммо улар бунга имконият яратмаяпти. Шунга қарамай, менга эътибор қаратаётган барчага жуда миннатдорман", — деди Волкановски Ариэль Хелванига берган интервьюсида.
Изоҳлар (0)