Xabi Alonso "Chelsi" etakchilaridan birini olib kelmoqchi

Madridning "Real" klubi London "Chelsi"sining etakchi futbolchisi Koul Palmerni o‘z safiga qo‘shib olishni rejalashtirmoqda. Bu haqda "Madrid Universal" akkaunti xabar tarqatdi.

Ma’lumotlarga ko‘ra, angliyalik yarim himoyachining transferiga "qirollik klubi"ning yangi bosh murabbiyi Xabi Alonso shaxsan qiziqmoqda. U Palmerni o‘z taktik sxemasiga mos futbolchi sifatida ko‘rmoqda.

21 yoshli futbolchi joriy mavsumdagi Klublar o‘rtasidagi Jahon chempionatida eng yaxshi futbolchi deb topilgan edi. Uning "aristokratlar" bilan amaldagi shartnomasi 2033 yilning iyunigacha mo‘ljallangan.

Transfermarkt ma’lumotiga ko‘ra, uning bahosi 120 million evroni tashkil qiladi. Avvalroq, unga PSJ klubi ham qiziqish bildirgani xabar qilingan edi. Shunga qaramasdan, londonliklar o‘zining ishonchli futbolchisini qo‘yib yubormoqchi emas.