Хаби Алонсо: "Мбаппега дриблинг эмас, иштиёқни ўргатиш мумкин"

Мадриднинг "Реал" клуби бош мураббийи Хаби Алонсо Килиан Мбаппе билан ишлаш жараёни ҳақида гапирди. Хабарингиз бор, 26 ёшли француз ҳужумчиси касаллик туфайли Клублар ўртасидаги Жаҳон чемпионатининг бутун гуруҳ босқичини ўтказиб юборганди. Аммо у яқинда сафга қайтди ва 1/8 финалда "Ювентус"га қарши баҳсда иштирок этиши кутилмоқда.

"Мбаппега дриблингни ўргатиш мен учун осон эмас. Лекин унга иштиёқ, ҳаракатчанликни ўргатиш — айнан биз, мураббийлар, эътибор қаратадиган жиҳат. Биз айнан шу йўналишда иш олиб бораяпмиз" — деди Алонсо матбуот анжуманида.

Испаниялик мутахассис бу орқали Мбаппега тўпсиз ҳолдаги ҳаракат, яъни жамоавий прессинг ва ҳимоядаги фаолликни назарда тутганини тахмин қилиш мумкин. Алонсо аввалроқ ҳам бир неча бор таъкидлаган эдики, унинг жамоасида барча футболчилар ҳимояда ҳаракат қилиши шарт.