Харидор кўпайиб кетди: “Ланс” Ҳусановни қанчага қўйиб юбориши маълум бўлди!
Қишки трансфер ойнаси тобора яқинлашиб келмоқда. Кучли клублар ўз таркибини мустаҳкамлаш учун бутун Европа бўйлаб янги истеъдодларни қидирмоқда. Ана шундай харидори кўп ўйинчиларга эга жамоалар эса, тушумларни ҳисоб-китоб қила бошлади.
Олдиндаги трансферлар даврида бозори қайнайдиган ўйинчилардан бири Абдуқодир Ҳусанов бўлади. 20 ёшли ҳимоячи жорий мавсум бошидан бери клуби “Ланс”да ҳам, Ўзбекистон миллий терма жамоасида ҳам юқори салоҳияти, истеъдоди ва маҳоратини намойиш қилиб келмоқда.
Айниқса, легионеримизнинг универсаллиги, ҳимоянинг ҳар қандай нуқтасида ишончли ўйнай олиши, ҳужум ташкил қилиши, майдонни яхши кўра олиши, аниқ паслари ва хавфли зарбалари унга бўлган қизиқишни кучайтириб келмоқда.
Франция оммавий ахборот воситалари Абдуқодир Ҳусановнинг трансфер имкониятларини ўрганиб чиқди ва “Ланс” бу савдодан қанча даромад кўрмоқчи эканини ҳисоб-китоб қилди.
Sports.uz портали икки нуфузли манбанинг ўзбек футболчиси атрофидаги вазият бўйича чиқарган маълумотларини футбол ишқибозлари эътиборига ҳавола қилади.
Леонс Сириак, foot-sur7.fr сайти эксперти:
“Ланс”да ўйнаётган ўзбек ҳимоячиси Абдуқодир Ҳусанов қишки трансферлар ойнаси очилишига бир неча ҳафта қолган паллада таклифларга кўмилиб кетди. Футболчи атрофида юзага келган рақобат оқибатида унинг нархи кескин ошмоқда.
Ёш ўзбек легионери жуда яхши спорт формасида эканини “Ланс” ўйинларида намойиш қилиб келмоқда. Унинг муваффақиятли ўйинлари Европанинг бир неча клублари эътиборини торта бошлаган.
Таниқли инсайдер Муҳаммаж Тубаш-Тер ПСЖ Ҳусановни кўзлаётганини биринчи бўлиб ёзганди. Парижликлар “данс” ўйинчисини пойтахтни тарк этиш эҳтимоли катта бўлган Милан Шкриньяр ўрнига январда олиб келмоқчи.
Ҳусановга Францияда яна бир жиддий талабгор бор. Таниқли мутахассис Роберто Де Дзерби бошқараётган “Марсель” раҳбарияти ҳимоя чизиғини кучайтириш учун Ўзбекистон терма жамоаси ўйинчисини олиб келмоқчи.
NEWS.DAYFR.COM портали:
Ўзбек футболчиси Абдуқодир Ҳусанов атрофида жиддий рақобат юзага келган. Хориж клубларидан бир нечтаси уни қўлга киритишга уриниб кўради. Ўйинчи учун курашга охири бўлиб, Хаби Алонсо бошқараётган Германия чемпионлари – “Байер” қўшилган эди.
Турли оммавий ахборот воситалари ва манбалар “Арсенал”, “Тоттенхэм” ва “Челси” каби Англия грандлари январда Ҳусановни олиш учун ҳаракат қилаётгани ҳақида маълумот чиқарди.
Бундан эътибор ортидан ҳимоячининг нархи кўтариляпти. The Team ҳамда L'Equipe каби манбаларнинг маълум қилишича, Ҳусановнинг трансфер нархи ҳозирнинг ўзида 10 миллион евродан ўтиб кетган. Лекин бу нарх “Ланс”ни умуман қониқтирмайди.
Трансферларга ихтисослашган италиялик инсайдер Николо Скира “Ланс” раҳбарияти 2023 йилнинг ёзида 100 минг еврога олинган Ҳусановнинг трансфери учун 40 МИЛЛИОН ЕВРО талаб қилишни режалаштираётгани ҳақида маълумот чиқарди.
Таъкидлаш жоизки, Ҳусановга бундай катта сумма белгилангани бежиз эмас. Яқинда бир неча манба “Ланс” Нил Ал-Айнауи ва Кевин Дансонинг трансфери барбод бўлиши ортидан 40 миллион евро миқдорида дефицитга тўқнаш келаётгани ҳақида хабар берган эди.
Экспертларнинг таъкидлашича, “Ланс” икки мақсадни кўзлаган. Биринчиси, агар Ҳусановни белгиланган 40 миллион еврога оладиган гранд клуб топилса, лансликлар дефицит масаласини биттада ёпади. Иккинчидан, “Ланс” ишонган ўйинчиси трансферига жуда катта бадал пули талаб қилиш орқали Абдуқодирни ўз таркибида сақлаб қолишни кўзлаётган бўлиши мумкин.
Хуллас, олдиндаги қишки ва ёзги трансфер ойналари даврида Абдуқодир Ҳусанов атрофида “қайноқ хабар ва янгиликлар” жуда кўп бўлиши кутилмоқда. Кутамиз, вазият қандай давом этишини вақт кўрсатади...
Фикрлар