Хайрулла Ҳамидов: "Мен Роналдунинг Ўзбекистонга қарши майдонга тушишини хоҳлайман"

АҚШ, Канада ва Мексика мезбонлик қиладиган навбатдаги Жаҳон чемпионатининг гуруҳ босқичи учун қуръа ташланди. Ўзбекистон терма жамоаси “К” гуруҳидан жой олди ва Португалия, Колумбия ҳамда Конго/Ямайка/Янги Каледония жамоалари билан баҳс олиб боради.

Таниқли футбол шарҳловчиси Хайрулла Ҳамидов Sports.uz сайтига берган интервьюсида Фабио Каннаваро бошчилигидаги жамоанинг гуруҳдаги имкониятлари ҳақида фикр билдирди.

“Португалия билан бир гуруҳга тушганимиз қанчалик яхши ёки ёмонлигини билмайман. Гуруҳимиздаги тўртинчи жамоа, эҳтимол, Конго бўлади деб ўйлаяпман. Португалия билан иккинчи турда ўйнашимиз яхши бўлди. Чунки улар биринчи турда Конгни ютиб олиши мумкин ва бизга қарши 70 фоиз куч билан ўйнаса, очко олиш учун кичик бўлса-да имкониятлар пайдо бўлади.Бироқ бунг учун Ўзбекистон биринчи турда Колумбия билан ҳеч бўлмаса дуранг ўйнаши керак.

Мен Криштиану Роналдунинг Ўзбекистонга қарши майдонга тушишини хоҳлайман. Биринчидан, мундиалда Роналдуга бутун дунё эътибор қаратади. Иккинчидан, сўнгги ўйинларда кўриниб турибдики, футболчилар унга керагидан ортиқ ўйнашади. Айрим ўйинларда унга 32 марта ҳаводан узатма берилган ҳолатлар ҳам бўлган.

Шу узатмалар натижасида у 2–3 та гол уриб жамоасини олиб чиқиши ёки аксинча, гол ура олмаса танқид остида қолиши мумкин. Роналдусиз эса жамоа тики-така ва майда паслар орқали 9 та гол урган ўйинлар ҳам бўлган. Чунки у майдонда бўлмагaнда улар эркинроқ ўйнашади. Шунинг учун менимча, Роналдусиз Португалия хавфлироқ. Лекин катта ўйинларда эмас.

Франция каби кучли жамоаларга қарши  у ҳимоячиларни ўзига тортииб, жамоасига фойда келтиради. Аммо Ўзбекистон билан учрашувда унинг майдонга тушгани биз учун маъқулроқ", — деди шарҳловчи.