Хитой чемпионатида гол урган Ислом Тўхтахўжаев терма жамоамизнинг Дубайдаги йиғинига қўшилади

Хитой биринчи дивизионида тўп сурган ҳамюртимиз Ислом Тўхтахўжаев ва унинг жамоаси учун мавсум якунига етди.

Бугун “Шеньян Урбан” клуби “Синьцзян Тяньшань” билан куч синашди ва унда 2:2 ҳисоби қайд этилди. Лекин Тўхтахўжаев жамоаси бу учрашувда мағлубиятга учраши ҳам мумкин эди. Аввалига ўйиннинг 13 ва 29-дақиқаларида меҳмонлар иккита гол урган ҳолда танаффусга 0:2 ҳисоби билан чиқиб кетди.

Иккинчи бўлимда эса, легионеримиз тўп сураётган жамоа ирода кўрсатди. Дастлаб, 69-дақиқада Ислом Тўхтахўжаев ҳисобдаги фарқни қисқартирди. Ҳакам томонидан қўшиб берилган охирги дақиқаларда эса мағлубиятдан қутилиб қолди. Шу тариқа, “Шеньян Урбан” 4-ўринни эгаллаб, ўз ўрнини сақлаб қолди.

Эътиборлиси шундаки, эндиликда Тўхтахўжаев миллий терма жамоамизнинг Дубайдаги йиғинига қўшилади. Бу ҳақида у sports.uz сайтига маълум қилди.

Фақат Хитойда чемпионат қачон якунланиши мавҳум бўлиб тургани сабабли, унинг терма жамоамиз таркибига қўшилиши сўроқ остида турган. Агар “Шеньян Урбан” бугун ютқазиб қўйганида, у ҳолда плей-офф босқичида иштирок этишига тўғри келарди, натижада легионеримиз терма жамоа йиғинига бора олмасди. Унинг голи жамоасининг дуранг қайд этишига катта ҳисса қўшди ва шу тариқа, Тўхтахўжаев энди Вадим Абрамов ихтиёрига қўшилади.

Матнда хатолик топсангиз, ўша хатони белгилаб, бизга жўнатинг (Ctrl + Enter)