Холанд “Челси”га ўтишга мажбурми?

Норвегиялик ҳужумчининг ёзги трансферлар мавсумидаги нархи 150-170 миллион фунтга баҳоланмоқда. Бу суммани пасайтиришнинг имкони йўқ. Сабаби “Боруссия” бу йил Жейдон Санчони сотади ва қўшимча маблағга муҳтож эмас. Қолаверса, дортмундликлар Холандни келаси мавсумга олиб қолмоқчи.

“Челси” раҳбарияти дортмундликлар билан дўстона алоқаларини ишга солиб, Холандни келаси мавсумда трансфер қилмоқчи. Маълумки, унинг шартномасида 2022 йилнинг ёзида ҳужумчи трансферини 75 миллион еврога амалга ошириш тўғрисидаги банд кучга киради.

Лондонликлар бу трансферни ҳозирдан ҳал қилиб қўймоқчи. Улар “Боруссия”дан келаси ёзда ҳужумчини айнан “Челси”га сотишни кафолатлашни сўраяпти.

Эрлинг Холанд аввалига “Челси”ни топ-клуб эмаслигини таъкидлаб, уларнинг таклифига қизиқмаган эди. Бироқ, Томас Тухель жамоани Европа Чемпионлар лигаси ғолиби айлантирганидан кейин ҳужумчининг фикри ўзгаргани ва “Челси” билан музокараларга тайёрлиги айтилмоқда.