Холанд “совуқ” рекорд ўрнатди

Англия Премьер-лигасининг олтинчи туридан ўрин олган учрашувда “Манчестер Сити” ўз майдонида “Бёрнли” устидан 5:1 ҳисобида зафар қучиб, қимматли уч очкога эга бўлди.

“Шаҳарликлар”нинг йирик ғалабасига меҳмонлар ҳимоячиси Максим Эстев “ёрдам” бериб юборди. Франциялик футболчи “Манчестер Сити”нинг ҳужумларини қайтаришда, икки марта ўз жамоаси дарвозасини ишғол қилиб қўйди.

Бир жуфт автоголдан ташқари, битта гол Матеуш Нуньеш ҳисобига ёзилган бўлса, манчестерликлар тўпурари Эрлинг Холанд ўйин якунланишига яқин дубль қайд этди ва жами саккизта гол билан лига тўпурарлари пойгасида биринчи ўринга кўтарилиб олди.

Бу учрашув Эрлинг Холанд учун тарихий аҳамият касб этди. 25 ёшли ҳужумчи Англия Премьер-лигасидаги умумий голлари сонини 93 тага етказиб олди. Натижани қайд этиш учун Эрлингга 103 та ўйин кифоя қилди.

Шу тариқа, Холанд совуқ ўлка – Норвегиядан келган футболчилар орасида Англия чемпионатида энг кўп тўп киритган ўйинчига айланди.

Аввалги рекорд “Манчестер Юнайтед” юлдузи Уле Гуннар Сульшерга тегишли бўлиб, у жами 235 та баҳсда ўз ҳисобига 91 та гол ёздириб қўйганди.