"Хоразм" бош мураббийи: "Биринчи бўлимда гол ўтказмасак ютқазмаслигимизни айтгандим"

“Хоразм” ва “Андижон” жамоалари (0:1) ўртасидаги учрашувдан кейинги матбуот анжуманида мезбонлар бош мураббийи Руслан Аҳмедов иштирок этди.

- Биринчи навбатда “Андижон” жамоасини ғалаба билан табриклайман. Дуранг натижа бўлганида адолатли бўларди. Бундай тажрибали жамоага нисбатан хавфли вазиятларни кўп ярата олмаслигимизни билгандик. Биринчи бўлимда кўпроқ ҳимояландик. Иккинчи бўлимда эса ҳужумга эътиборни оширдик. Тактик жиҳатдан рақибга қарши тайёргарлик кўргандик. Йигитларимиз имкон даражасида ўйнашди. Лекин тажрибамиз етмади. Биринчи бўлим охирларида бироз мувозанатни йўқотиб қўйдик. Боз устига “Андижон” стандартда яхши қуролланган. Уларнинг энг хавфли қуроли мана шунда – аутлар, бурчак ва жарима зарбарларидаги стандартлардир. Учрашув мобайнида барибир бизга мувозанат етишмади. Барибир ўйин учун футболчиларга раҳмат айтдим. Энди кейинги учрашувга тайёргарлик кўрамиз.

- “Хоразм” жамоаси иккинчи даврада ижобий томонга ўзгаришни бошлади. Ўзингиз хоҳлаган ўйинни йўлга қўя олдингизми?

- Ҳа, аста-секин бўляпти. Таркибни ёшартирганмиз. Мавсум бошига нисбатан энди камроқ хатолар қиляпмиз. Аста-секин ўйинчиларимизнинг тажрибалари ортяпти. Футболда мураббийга натижа қилиш учун уч йил вақт бериш керак. Дастур бўйича ишлашда давом этяпмиз. Режаларимизни 60-70 фоизга амалга оширишга ҳаракат қиляпмиз.

- “Хоразм” биринчи даврада “Андижон”ни қабул қилиб 3:0 ҳисобида ғалаба қозонганди. Бу сафар ютқаздинглар. Ўша учрашув билан таққослаган рақиб жамоа ўйинида қандай ўзгаришларни кўрдингиз?

- Биз кўпроқ ҳимояда ўйнадик. Иккинчи таймда қарши ҳужумлар бўлди. Умуман олганда, “Андижон”нинг ўйини ўзгармади. Бу ўйинга тайёргарлик кўргандик. Футболчиларга агар биринчи таймда гол ўтказиб юбормасак ютқазмаймиз деб айтгандим. Балки яратилган вазиятлардан фойдаланганимизда бошқача бўларди. Афсус, биринчи бўлим охирларида гол ўтказдик ва натижа шундай бўлиб қолди. Озроқ ҳаяжон ҳам бўлди. Янги стадиондаги биринчи ўйин эди. Афсуски, мухлисларимизни байрам билан қувонтира олмадик. Майли, келаси учрашувга тайёргарлик кўрамиз. Ўйинлар давом этади. “Хоразм” мухлисларини хурсанд қиламиз.

- Майдон ҳолати ҳақида фикрингиз?

- Майдон чими аъло даражада, 4 баҳо. Лекин ўзимиз ҳам бу майдонда кам машғулот қилдик. Иккинчи таймда қанотлар орқали ҳаракат қилдик. Бу майдонда энди ўйнаяпмиз ва ҳали майдонни сезиш у қадар яхши эмас.