![](https://static.sports.uz/crop/7be45d90db14812ee2ebf2ec2de9bdcb.jpg)
Хорижлик экспертлар қайси боксчиларимиз Парижда чемпион бўлишини айтди!
Париж шаҳри мезбонлик қилаётган ёзги Олимпия ўйинларида бирин-кетин спорт турлари бўйича мусобақалар бошланмоқда.
Спорт соҳаси мутахассислари спортчиларнинг тўртйилликнинг энг нуфузли мусобақасидаги иштирокини таҳлил қилиб, мухлисларни ўз хулосалари билан таништириб бориши одатий ҳолга айланган.
Дунёга машҳур Sports Illustrated нашри экспертлари Париж Олимпиадасининг бокс мусобақаларига оид таҳлиллари натижасини эълон қилди. Улар етти вазнда эркаклар ўртасида ва олтита оғирлик тоифасида хотин-қизлар ўртасидаги беллашувларда олтин медални қўлга киритиши мумкин бўлган чарм қўлқоп усталари рўйхатини тузиб чиқди.
Эътиборли томони шундаки, нуфузли нашр экспертлари бу галги Олимпия ўйинларида ҳам ўзбек бокс мактаби тарбияланувчиларининг имкониятини энг юқори баҳолади.
Таҳллилларга кўра, ўзбекистонлик боксчилар эркаклар ўртасидаги баҳсларда Олимпиаданинг жами бешта медалини қўлга киритиши кутиляпти.
Хусусан, Sports Illustrated нашрининг ёзишича, Ҳасанбой Дўсматов, Абдумалик Халаков ва Баҳодир Жалолов Париж Олимпиадасида ҳам шоҳсупанинг энг юқори поғонасига кўтарилади. Бу бокс усталарининг бари амалдаги жаҳон чемпионларидир. Ҳасанбой 2016 йилги олимпия чемпиони ва ўша мусобақада техникаси энг зўр иштирокчига бериладиган Вэл Баркер кубогини қўлга киритган.
Дўсматов ҳамон бу совринни ўзида сақлаб турибди.
Баҳодир Жалолов Олимпия ўйинларининг амалдаги чемпиони сифатида ўз унвонини яна бир бор ҳимоя қилиш учун рингга чиқади.
Шунингдек, халқаро экспертлар Ўзбекистон терма жамоаси аъзоларидан жаҳон чемпион Асадхўжа Мўйдинхўжаевдан кумуш, оғир вазнли боксчимиз Лузизбек Мулложоновдан бронзе медаль кутмоқда.
Sports Illustrated тахминлари бўйича эркаклар ўртасидаги баҳсларда қолган олтин медалларга Софьян Умиа (Франция), Севон Окадзава (Япония), Арлен Лопес (Куба), Хулио Сесар Ла Крус (Куба) эга чиқиши мумкин.
Хотин қизлар беллашувида Бусе Чакироглу (Туркия), Хуан Сяовэнь (Тайвань), Ирма Теста (Италия), Беатрис Феррейра (Бразилия), Ян Лю (Хитой) ва Таммара Тибо (Канада) каби спортчиларнинг имкониятлари юқори баҳоланмоқда.
Бокс бўйича Ўзбекистон эркаклар терма жамоаси Париж рингларида ўзларига рўбарў келадиган дастлабки рақибларини билиб олди. Улар билан танишинг:
Бокс бўйича эркаклар ўртасидаги баҳслар қуръа ташланд. Вакилларимизнинг дастлабки жанглари билан танишинг:
-51 кг: Ҳасанбой Дўсматов - Хесус де Лопес (Пуэрто-Рико)
-57 кг: Абдумалик Халаков - Небил Ибраҳим (Швеция) ва Васим Абусал (Фаластин) баҳси ғолибига қарши.
-63,5 кг: Руслан Абдуллаев - Мартинес Рамирес (Мексика)
-71 кг: Асадхўжа Мўйдинхўжаев - Омар Элавади (Миср)
-80 кг: Тўрабек Ҳабибуллаев - Эф Марсял (Филиппин)
-92 кг: Лазизбек Мулложонов - Азиз Аббес Моҳиддин (Италия)
+92 кг: Баҳодир Жалолов - Омар Моҳамед Шиҳа (Норвегия)
Эслатиб ўтамиз, ўзбек спортчилари Олимпия ўйинларида энг кўп олтин медални айнан бокс мусобақаларида қўлга киритган. Ҳозирга қадар улар бешта олтин, иккита кумуш ва саккизта бронза медалга эга чиққан.
Ўзбек боксчиларидан Муҳаммадқодир Абдуллаев (“Сидней-2000”), Ҳасанбой Дўсматов, Шаҳобиддин Зоиров, Фазлиддин Ғойибназаров (“Рио-де-Жанейро-2016 ”) ва Баҳодир Жалолов (“Токио-2020”) Олимпия ўйинлари ғолиби бўлган.
Фикрлар