Хорижлик мутахассис: Катанец нима қилаётганини билади

Таниқли СПОРТ Стар портали мутахассиси Бҳатчар Нееладри сайтимизга Ўзбекистон ва Ҳиндистон ўртасидаги баҳс олдидан интервью берди. Унинг бир неча соатдан сўнг, бўладиган қарама-қаршилик ва термамизнинг мусобақадаги имкониятлари ҳақида билдирган фикри билан танишинг.

Бугунги баҳсдан нима кутяпсиз?

- Бугунги баҳсда терма жамоангизни 2 тўп фарқи билан ғалаба қозонишини кутяпман. Қизиқ ўйин бўлади деб ўйламайман. Ўзбекистон юқори прессинг ёрдамида ҳудди Австралия қилгани каби, Ҳиндистонни ўз жарима майдончасига қамаб ташлашга ҳаракат қилади. Таркибда яхши савиядаги ижрочиларнинг бор эканлиги бунга имкон яратади.

Умуман, терма жамоамиз ва Сречко Катанец борасида қандай фикрдасиз?

- Ижобий. Катанец деярли 3 йил давомида яхши жамоа қура олди. Тўғри, ҳозир таркибда Элдор Шомуродов ва бир нечта етакчилар йўқ, аммо уларни ўрнини бошқа ижрочилар билан тўлдиришингиз мумкин. Сўнгги йилларда Ўзбекистон U17 ва Ўзбекистон U20 терма жамоаларини кўрсатаётган натижалари Осиё футбол эътиборида бўлиб турибди. Юртингизда, футболни қандай севишлари бизга маълум. Менимча, ҳозир Катанец нима истаётганини билади. У аниқ стратегия билан
мусобақага келган.

Терма жамоамизнинг мусобақада ғолиблик учун имкониятлари қандай?

- Менимча, гуруҳдан бемалол кейинги босқичга ўтасизлар. Нимчорак финалда сўзсиз ғалаба кутяпман. Айнан, чорак финал босқичида чинакам кучли рақиб билан куч синашишга тўғри келади. Мени тахминим чорак финал, аммо терма жамоангиз ярим финалга қадар етиб борса, ҳайрон қолмайман.