Хулиан Альварес «Арсенал» бош мураббийи Артета қўнғироғига жавоб бермади

«Арсенал» бош мураббийи Микель Артета ҳужумчи Хулиан Альварес билан шахсан гаплашишга уринди, аммо у билан боғланишнинг иложи бўлмади. Бу ҳақда испаниялик журналист, El Chiringuito TV телеканали шарҳловчиси Хосеп Педреоль маълум қилди.

Унинг сўзларига кўра, Артета Альваресга қўнғироқ қилган, лекин аргентиналик футболчи қўнғироқни ҳам кўтармаган. «Барселона» эса ҳозирча «Атлетико» президенти Энрике Сересо ва спорт директори Мигель Анхель Хиль Марин ўз позициясини қайта кўриб чиқишига ва Хулианни сотишга рози бўлишига умид қилмоқда.

Маълумки, Лондон клуби ёзги трансфер ойнаси очилганидан бери Альваресни ҳужум чизиғини кучайтириш учун асосий номзод сифатида кўриб келмоқда. Бироқ 25 ёшли форварднинг ўзи фақат «Барселона»га ўтишни истаяпти. «Атлетико» эса ҳозирча каталонияликлар таклифини кескин рад этмоқда ва футболчини тўғридан-тўғри рақибга беришни хоҳламаяпти.

Италиялик инсайдер Фабрицио Романо тарқатган маълумотларга кўра, «Арсенал» раҳбарияти Мадрид клуби билан келишувга эришиш мумкин, деб ҳисобламоқда. Шу билан бирга, лондонликлар расмий таклифни фақат битта шарти билан — Альвареснинг ўзи Англияга кўчиб ўтишга розилик берса, юбориш ниятида.