Ямал “Барса” ўйинчиларининг ғазабига дучор бўляпти

Испаниянинг нуфузли нашрларидан El Nacional “Барселона” клуби ички муҳитида 17 ёшли Ламин Ямал туфайли зиддият келиб чиқаётгани ҳақида маълумот тарқатди.

Маълумки, Ламин Ямал ёзда 18 ёшга тўлади ва клуб билан янги профессионал шартнома имзолайди. Айни пайтда бу ўйинчи ўсмирларга мўлжалланган келишув асосида тўп тепмоқда ва йилига 3 миллион евро миқдорида маош оляпти.

Энди истеъдод эгаси янги шартнома тузиши билан натижаларига кўра, хизмат ҳақи олади. Ламин “Барселона”да энг катта маош оладиган ўйинчига айланиши кутилмоқда. У энди жамоада энг катта пул топаётган Роберт Левандовскидан ҳам кўп олади.

Манбага кўра, Ламин Ямалнинг янги битим бўйича маоши йилига 35-40 миллион еврони ташкил қилиши кутиляпти. Бу ҳолат клубнинг бошқа ўйинчиларини безовта қила бошлади. Айниқса, жамоанинг тажрибали ўйинчилари Ямал туфайли маошлар баланси бузилишини рўкач қилиб, ёш футболчига катта имтиёз бериш нотўғри эканини таъкидлашмоқда.

Шунга қарамай, жамоада Ламин Ямалнинг ноёб иқтидорини қадрлаётган ва уни жамоанинг ҳақиқий етакчиси сифатида эътироф этаётган ўйинчилар ҳам бор.