Ямал “Футбол Қироли”нинг 67 йиллик рекордини такрорлади

УЕФА Миллатлар лигасининг ярим финалида Испания терма жамоаси франциялик футболчиларни 5:4 ҳисобида мағлубиятга учратиб, мусобақа финалга йўлланма олди.

Учрашувда бир жуфт гол урган 17 ёшли Ламин Ямал тарихий натижа қайд этди. Испаниялик юлдуз 18 ёшга тўлгунга қадар Франция терма жамоаси дарвозасига учта гол урган футбол тарихидаги иккинчи ўйинчига айланди.

Ямал французлар дарвозасига биринчи голини ўтган йили ёзда Европа чемпионати  ярим финалида урган ва жамоасининг 2:1 ҳисобидаги ғалабасини таъминлаган эди.

Stats Foot статистика марказининг маълум қилишича, футбол тарихида фақатгина Пеле 18 га тўлмай туриб, Франция терма жамоаси дарвозасини уч бор ишғол қилган эди. Кейинчалик “Футбол Қироли” номини олган бразилиялик ҳужумчи 1958 йили Швецияда ташкил этилган жаҳон чемпионати ярим финалида французларга қарши учрашувда хет-трик қайд этган.

“Барселона” ва Испания терма жамоаси ҳужумкор футболчиси Ламин Ямал 13 июль куни 18 ёшга тўлади.