Ямал Мбаппенинг рекордини йўққа чиқарди

Испания чемпиони “Барселона”нинг ҳужумкор футболчиси Ламин Ямал УЕФА Чемпионлар лигасида янги рекорд ўрнатди.

Чемпионлар лигаси 1/8 финали жавоб ўйинида “Барселона” ўз майдонида Англиянинг “Ньюкасл” жамоасини 7:2 ҳисобида мағлуб этди.

Ямал ушбу ўйинда гол урди ва голли узатма берди. Энди Ламин ҳисобида Чемпионлар лигасида 10 та гол бор. Шу тариқа, 18 ёш 248 кунлигида у ушбу кўрсаткичга эришган энг ёш ўйинчига айланди.

Ямал бу кўрсаткич бўйича Мадриднинг “Реал” жамоаси ҳужумчиси Килиан Мбаппенинг рекордини янгилади. Мбаппе шу пайтгача қитъанинг энг нуфузли турнирида энг ёш ўйинчи сифатида 10 та гол урган рекордчи ҳисобланарди. Килиан бу маррани 18 ёшу 350 кунлигида забт этган.

Эслатиб ўтамиз, “Барселона” футболчилари “Ньюкасл”ни икки ўйин натижасига кўра 8:3 ҳисобида мағлуб этиб,  Чемпионлар лигаси чорак финалига йўл олди. Энди кейинги босқичда каталонияликлар ўзлари яхши билан Мадриднинг “Атлетико” клубига қарши тўп тепади.