Янги бизнес: “Барса” Рэшфордни сотиб олиб, дарҳол қимматига сотади

“Манчестер Юнайтед” тарбиланувчиси Маркус Рэшфорднинг келажаги мавҳум бўлиб турибди. Манчестерликлар 28 ёшли футболчини мавсум бошида Каталонияга жўнатиб, “Барселона”га ижарага берган эди.

Испан грандида тажрибали футболчини 30 миллион еврога трансфер қилиш ҳуқуқи бор. Бироқ каталонияликлар молиявий аҳволидан келиб чиқиб, шу суммани тўлашга ҳам қийналади.

Transfer News Live ва  El Nacional каби манбаларнинг хабар беришича, молиявий муаммолардан чиқиб кета олмаётган “Барселона” Рэшфордни тўлиқ трансфер қилганидан кейин уни фойда эвазига дарҳол қайта сотишни кўзламоқда.

Номлари сир тутилаётган айрим клублар 28 ёшли футболчи учун ушбу сумманинг деярли икки бараварига тенг маблағни тўлашга тайёр. Шу сабабли бундай келишув иқтисодий жиҳатдан каталонияликлар учун жуда фойдали бўлиши мумкин.

Жорий мавсумда Маркус Рэшфорд Ханс-Дитер Флик жамоаси сафида 34 та ўйинда иштирок этиб, 10 та гол урди ва 13 та голли узатма берди.