Янги рекорд: Бир жамоанинг ўн футболчиси "Олтин тўп"га даъвогар

«Пари Сен-Жермен» бу йил «Олтин тўп» учун овоз беришда рекорд кўрсаткич қайд этиши мумкин. Журналист Бен Жейкобс хабарига кўра, 30 нафар номзод орасида бир йўла 10 нафар парижлик футболчи бўлиши кутилмоқда. 

Шу тариқа француз клуби ўтган йилги натижасини янгилайди: ўшанда «ПСЖ»дан тўққиз нафар футболчи рўйхатга кирган эди.

Барча номзодлар рўйхати сешанба куни эълон қилинади. Эслатиб ўтамиз, ўтган йили «Олтин тўп» соврини «ПСЖ» ҳужумчиси Усману Дембелега насиб этган, иккинчи ўринни «Барселона» вингери Ламин Ямаль, учинчи поғонани эса яна бир парижлик футболчи Витинья эгаллаган эди.

 «Олтин тўп»ни топшириш маросими жорий йил 26 октябрь куни Лондон шаҳрида бўлиб ўтади.

Қайд этиш керакки, Луис Энрике бошқарувидаги «Пари Сен-Жермен» ўтган мавсумда қаторaсига иккинчи бор Чемпионлар лигасида ғолиб чиққан эди.