Yaponiya bilan o‘yin haqida Jamoliddin Rahmatullaev: Shogirdlarim ko‘rsatmalarimdan ko‘ra emotsiyaga ko‘proq berildi

Tailandda bo‘lib o‘tayotgan Osiyo chempionatida ishtirokini boshlagan O‘zbekiston U-17 terma jamoasi ilk turda Yaponiya bilan durang natijaga imzo chekdi. Bahsdan so‘ng jamoamiz ustozi Jamoliddin Rahmatullaev kichik intervyu berdi. Shuningdek, jamoamiz a’zolari Amirbek Saidov va Muhammad Yusuf Sobirov ham o‘z fikrlari bilan o‘rtoqlashdi.

Jamoliddin Rahmatullaev

- “Kechagi bahsni juda yaxshi boshladik. To‘pni o‘zimizga ishongan holda nazorat qildik. Afsuski, o‘tkazib yuborilgan tezkor gol bolalarning ruhiyatiga ta’sir qildi. Qolgan vaqtda hisobni tenglashtirish uchun oldinga shoshildik. Kecha murabbiyning ko‘rsatmalaridan ko‘ra, ruhiyatga tayangan futbol o‘ynadik. So‘nggi daqiqalarda shogirdlarim xarakter namoyish etib, o‘yinni qutqarib qolishdi. Vaholanki, bahs yakunida yana bir golli imkoniyatga ega bo‘lgan edik. Uni amalga oshirganimzida, bemalol o‘yinni g‘alaba bilan yakunlagan bo‘lar edik. Keyingi o‘yinlarda imkon qadar yaxshiroq natija qayd etib, g‘alaba qozonishga harakat qilamiz. Keyingi o‘yinda Hindiston bilan kuch sinashamiz. Yil boshida ular bilan ikki bor o‘rtoqlik o‘yinida ishtirok etganmiz. Ularning tezkor va kreativ futbolchilari bor. Barchasini ko‘rib chiqamiz va kerakli echimni topamiz.”

Amirbek Saidov:

- “O‘tgan o‘yinda g‘alaba uchun maydonga chiqdik. Tezkor gol o‘tkazib yuborganimizdan so‘ng vaziyatni o‘nglash uchun ko‘p vaqt ketib qoldi. Shunga qaramay, oxirigacha kurashdik. Og‘ir bo‘lsada, yakunda o‘yinni o‘zimiz tomonga burib yubordik.”

Muhammad Yusuf Sobirov:

- “Hindistonga qarshi o‘yinga tayyorgarlikni boshlaganmiz. Bu maydonga faqat yutgani chiqamiz. Hindiston singari Vetnam bilan ham g‘alaba uchun maydonga chiqamiz. Bu turnirdagi niyatim - klubim va terma jamoam sharafini munosib himoya qilish. Eng yaxshi darvozabon sifatida Osiyo chempioni bo‘lmoqchiman.”

Eslatib o‘tamiz, terma jamoamiz Osiyo chempionatining ikkinchi tur doirasida 20 iyunda Hindistonga qarshi o‘yinda maydonga chiqadi. Bahs telekanallar orqali namoyish etilmagani bois, SPORTS.uz telegram kanalida namoyish etiladi.