Яхшибоев жамоаси бу борада энг зўри...
Молдова чемпиони “Шериф” Чемпионлар лигасининг гуруҳ босқичида иштирок этган Шарқий Европа вакиллари орасида энг юқори кўрсаткични қайд этди.
Молдова тарихида илк бор Чемпионлар лигасининг гуруҳ босқичида қатнашган тирасполликлар бу йилги мусобақанинг ҳақиқий кашфиётига айланди.
“D” гуруҳида “Реал”, “Интер” ва “Шахтёр” билан рақобатлашган “Шериф” ўз ўйини билан кўпчилик мухлису мутахассислар эътибори ва эҳтиромини қозонди.
“Шериф” ўз уйидга нисбатан сафар учрашувларида яхшироқ натижа қайд этди. Дастлабки, Тирасполда украиналик “кончилар”ни 2:0 ҳисобида мағлубиятга учратган “Шериф” вакиллари кейинги баҳсда “Сантьяго Бернабеу”дан 2:1 ҳисобидаги шов-шувли ғалаба билан қайтди. Мазкур учрашувда “Реал” дарвозасига тўп киритган Жасур Яхшибоев ўзбек футболчилари орасида Мадридда гол урган биринчи ўйинчимиз сифатида футбол тарихидан жой олди.
Жасур Яхшибоев жорий мавсумда Чемпионлар лигасида учта учрашувда жами 206 дақиқа ҳаракат қилди ва ўз ҳисобига битта гол ёздириб қўйди. Ҳамюртимиз Мадриддаги беллашувда олган жароҳати туфайли халқаро турнирда жамоасига кўп ҳам ёрдам бера олмади.
Юрий Вернидуб шогирдлари гуруҳда фақатгина “Интер”га ҳар икки учрашувни бой берди. “Реал” шармандали мағлубият учун Тирасполда реванш олди.
Гуруҳ баҳсларининг сўнгги турида “Шахтёр” яна “Шериф”ни енголмади ва 1:1 ҳисобидаги дурангга рози бўлди.
Умумий ҳисобда етти очко жамғарган “Шериф” Шарқий Европа вакиллари ўртасида энг юқори кўрсаткични қайд этди. Бу борада иккинчи ўринни беш очко жамғарган Россия чемпиони “Зенит” эгаллади.
Украинанинг икки клуби учун Евромавсум эрта ва муваффақиятсиз тугади. “Шериф” билан бир квартетда ўйнаган “Шахтёр” гуруҳ баҳсларини ғалабасиз якунлаб, атиги икки очко тўплади холос.
Киевнинг “Динамо”си эса олтита учрашувдан фақат биттасида дуранг қайд этиб, ўз гуруҳида охирги ўринда қолди. Айниқса, киевликлар бу баҳсларда атиги битта гол урган украиналик мухлисларнинг кайфиятини тушириб юборди.
Шу тариқа, Шарқий Европа жамоаларининг бирортаси Чемпионлар лигасидаги иштирокини давом эттиролмайдиган бўлди. “Шериф” ва “Зенит” Европа лигасига қўшилади.
“Шериф” Европа лигасига йўлланма билан бирга 500 минг еврога ҳам эга бўлди. Шу тариқа, Тирасполь клубининг жорий мавсумда Европа Чемпионлар лигасидан топган даромади 23,8 миллион еврони ташкил қилди.
Умуман олганда, Чемпионлар лигаси гуруҳ босқичида учинчи ўрин соҳиблари бўлган “Аталанта” (Италия), “Барселона” (Испания), “Боруссия” (Дортмунд, Германия), “Зенит” (Россия), “Лейпциг” (Германия), “Порту” (Португалия), “Севилья” (Испания) Европа лигасининг ўтиш турнирида қатнашади.
Уларга Европа лигасида ўз гуруҳида иккинчи ўринни эгаллаган “Бетис” (Испания), “Брага” (Португалия), “Динамо” (Загреб, Хорватия), “Лацио”, “Наполи” (Италия), “Олимпиакос” (Греция), “Реал Сосьедад” (Испания) ва “Рейнжерс” (Шотландия) футболчилари рақиблик қилади.
Ўтиш учрашувларига 13 декабрь куни қуръа ташланади. Ўйинлар 17 ва 24 февралга белгиланган.
Европа Лигаси ғолиби 18 май куни аниқланади.
Комментарии