Ёш юлдуз “Барса” ва “Реал”га ўтишни рад этди

“Бенфика”да порлаётган чап қанот ҳимоячиси Альваро Каррерас Португалия клубига содиқ эканини намойиш қилди.

Истеъдодли ёш ўйинчига “Реал” ва “Барселона” каби қудратли клублар кўз тикаётган эди. Бироқ Альваро ҳозирги жамоасидан кетишга шошилмаслигини таъкидлади.

Каррерас Европа Чемпионлар лигаси доирасида “Барселона”га қарши ўтказилган учрашувда салоҳиятини намойиш эта олди. Шу ўйиндан кейин гранд клублар бу ҳимоячига жиддий эътибор қарата бошлади.

- Мен “Бенфика”да бахтиёрман. Бу жамоа менга ўсиш имкониятини берди ва улардан умрбод қарздорман, - деди Альваро Каррерас.

“Бенфика” мутасаддилари ёш ўйинчи билан 2029 йилнинг ярмигача давом этадиган шартнома тузган. Битимда ўйинчини олмоқчи бўлган клуб 50 миллион евро миқдорида бадал пули тўлаши кераклиги аниқ қилиб белгилаб қўйилган.