Ёши "ўқланган" футболчи сабаб клубдан 33 очко олиб ташланади

Боливиянинг "Аврора" клубидан 33 очко олиб ташланди. 

Боливия футбол федерацияси тартиб-интизом қўмитаси қанот ҳужумчиси Габриел Монтанонинг шахсий маълумотлари ва ёши сохталаштирилганлиги муносабати билан шундай қарор қабул қилди. Қайд этилишича, футболчининг асл исми Диего Монтаньо бўлиб, аслида у 20 ёш эмас, балки 25 ёшда эканлиги аниқланган. 

Футболчи икки йилга дисквалификация қилинади. Клуб раҳбариятига, шунингдек, президентга ҳам санкция қўйилган. 

Таъкидланишича, очколарнинг олиб ташланиши ўтган мавсум натижаларини ўзгартирмайди. Жамоа янги турнирни шунчаки - 33 очко билан бошлайди. 2025 йилги мавсум апрель ойида бошланиши режалаштирилган.