Йозеф Блаттер: Инфантино ва Трамп ўртасидаги яқинлик жаҳон футболига зарар етказмоқда

Халқаро футбол федерацияси (ФИФА)нинг собиқ президенти Йозеф Блаттернинг фикрича, ташкилотнинг амалдагӣ раҳбари Жанни Инфантино ва АҚШ президенти Дональд Трамп ўртасидаги яқин муносабатлар жаҳон футболи манфаатларига зид.

ФИФА ўтган сешанба куни янги тузилма ташкил этиш ва унга ташкилотнинг тижорий ҳамда медиа ҳуқуқларини ўтказиш режаси ҳақида маълум қилди. Лойиҳа доирасида хусусий инвесторларга ушбу янги тузилманинг тахминан 20 фоиз акциясини сотиш орқали 4,2 миллиард доллар жалб этиш кўзда тутилган.

Европа футбол ассоциациялари иттифоқи (УЕФА) бу режаларни кескин танқид қилиб, махсус баёнот эълон қилди. ОАВда ёзилишича, акцияларнинг бир қисмини Жошуа Кушнер фонди сотиб олиши мумкин. Жошуа Кушнер – Дональд Трампнинг куёви Жаред Кушнернинг акаси ҳисобланади.

Йозеф Блаттер бу ҳолатга ўз муносабатини билдириб, ижтимоий тармоқда қуйидаги фикрларни ёзди:

“ФИФА раҳбари ва АҚШ президенти ўртасидаги яқин алоқалар молиявий майдонга кўчди, бу эса футболга жиддий зарар етказмоқда. Ҳеч ким бизнинг ўйинимизни сотишга ҳақли эмас”, – дея таъкидлаган Блаттер.

Эслатиб ўтамиз, Жанни Инфантино 2016 йили ФИФАдаги коррупция можароси ортидан Йозеф Блаттер ўз лавозимини муддатидан олдин тарк этгач, ташкилотга раҳбар этиб сайланган эди.