Ёзнинг жазирамасида Суперлигада "қайноқ ҳарорат"даги ўйинлар ёхуд 14-турда жамоаларнинг имкониятлари қандай?

Суперлига иштирокчилари ёзги йиғинини якунлаб, яна катта саҳнага қайтмоқдалар. Мухлислар ўз суюклиларининг ўйинларини сабрсизлик билан кутишаётгани рост.

27 июлда старт оладиган иккинчи давра сиз  билан бизга ёзнинг қайноқ ҳарорати каби оловли ўйинларни тақдим этади.

14-тур 30 июлга қадар давом этади. “Шўртан” бош мураббийи Анвар Бердиев иккинчи давранинг илк туридаги жуфтликлар имконияти ҳақида гапирди.

27 июль

“Бухоро” – “Турон”

- Аввало айтмоқчиманки, бу менинг шахсий фикрларим. Нима бўлишини Худо билади. Мен фақат ўз қарашларимни айтаман.

Иккинчи даврада “Бухоро”га орқага йўл йўқ. Бош мураббий Улуғбек Бақоев ёзда таркибни яхши шакллантириб олди. Лекин “Турон” ҳам анча ўзгаришлар қилди ва таркибини ёшартирди. Иккала жамоага ҳам омад тилайман. Менимча, кучлар тенг. “Бухоро”га янги келган ўйинчилар дарров Бақоевнинг тактикасига мослашиб кетиши енгил кечмайди. “Турон”да ёшлар ва агар уларнинг ўйини ўхшаб қолса ўзларини эркин ҳис қиладилар ҳамда рақибга қийинчилик туғдириши мумкин. Ўйлашимча, имкониятлар 50х50.

28 июль

“Андижон” – “Насаф”

- Ооо, бу жуда қийин ўйин бўлади. “Андижон”ни ўз майдонида ўйнаши аниқ бўлди. “Насаф”га ниҳоятда оғир. “Андижон” биринчи даврани кўтаринки руҳда олиб борди. Бунинг устига улар биринчи даврадаги уй учрашувларини асосан Фарғонада ўтказдилар. Андижон халқи ўз жамоасини “Бобур Арена”да кутяпти. Шунинг учун “Андижон” футболчилари катта қўллаб-қувватлов остида ўйнайдилар. Чемпионатнинг очилиш ўйинида “Андижон” Қаршида “Насаф”ни ютиб кетган. Бу эса Рўзиқул Бердиев ва унинг шогирдларига алам қилган бўлиши мумкин. Ўшанда 1-турнинг сенсацияси бўлганди. Менимча, ушбу учрашувда ҳам имкониятлар 50х50.

“Олимпик” – “Пахтакор”

- “Олимпик” Тимур Кападзе бошчилигида иккинчи даврага яхши тайёргарлик кўрди. Бу клубни қандай куч эга эканлигини биламиз. 1-турда “Пахтакор” майдонида ғалаба қозонган. Иккинчи даврада “Пахтакор” ҳам анча яхши ҳозирлик кўрди. Легионерларни олди. Жуфтликда 45х55 “Пахтакор” фойдасига.

29 июль

“Нефтчи” – “Металлург”

- “Металлург” ҳам иккинчи давра олдидан таркибини кучайтирди. Биринчи даврада “Нефтчи” Бекободда 3:0 ҳисобида ғалаба қозонган. Энди осон ўйин бўлмайди. “Нефтчи”ни ўз майдонида ва биринчи даврани кўтаринки руҳда ўтказганини ҳисобга олсак, бу ерда мезбонларнинг имконияти 60х40 деб ўйлайман.

ОКМК – “Сурхон”

- Биринчи даврада ОКМКнинг ўйинларини кузатдим. Тўғриси, улар кераксиз жойларда очколарни йўқотишди. Лекин Миржалол ака Қосимов иккинчи даврада бундай хатолар такрорланмаслигини билади. Назаримда, бу жуфтликда 60х40 ОКМК ютса керак.

30 июль

“Бунёдкор” – “Сўғдиёна”

- “Бунёдкор”га янги мураббий келган. Рости, уларнинг ўйинларини кузатганим йўқ, қандай ўзгаришлар бўлганини яхши билмайман. Шахсий фикрим шундайки, ўйинда кучлар тенг.

“Қизилқум” – “Навбаҳор”

- “Навбаҳор”ни қандай кучга эгалигини биламиз. Таркиб бўйича ҳам “Навбаҳор” Ўзбекистонда энг яхшиси деса ҳам бўлади. “Қизилқум”га қийин бўлади. Менимча, имкониятлар 45х55 “Навбаҳор” устунлигида. Меҳмонлар ғалаба қозонса керак.

Шуҳратбек Жўраев.