Yulduzlik kasali: Xoland “Arsenal” ustoziga qo‘pollik qildi va raqib yulduzi bilan urishib ketdi

Angliya Premer-ligasi beshinchi turining markaziy uchrashuvida “Arsenal”ga to‘qnash kelgan “Manchester Siti” o‘z muxlislari ko‘z o‘ngida mag‘lubiyatdan zo‘rg‘a qutilib qoldi.

O‘yin yakunlanishiga bir necha soniya qolganida Jon Stounz hisobni tenglashtirishni uddaladi – 2:2.

Bellashuvda hisobni ochgan Erling Xoland o‘yin oxirida va undan keyin hunar ko‘rsatdi. Avvaliga norvegiyalik to‘purar raqibning boshiga to‘p otdi.

Uchrashuvdan keyin esa, Xoland “kanonirlar” ustozi Mikel Artetaning elkasini qoqib, “Hoy sen, oddiyroq bo‘laver”, deb tanbeh berdi.

24 yoshli futbolchining xulqi ilgari “shaharliklar” safida o‘ynab ketgan Gabriel Jezusga yoqmadi va Xolanddan bosh murabbiyga nega bunaqa qilayotganini so‘radi.

Xoland braziliyalik hamkasbini ham ayagani yo‘q. Erling Jezusning savoliga “Men nima dedim? Hech narsa deganim yo‘q, sen ahmoq masxarabozsan! Bu erdan yo‘qol, masxaraboz!” qabilida haqorat bilan javob qaytardi.

Ishga Mikel Arteta aralashib, Jezusga Xoland bilan tortishmaslikni va mojaroga bormaslikni buyurdi.