"Ювентус" "Ливерпуль"дан кетаётган футболчи учун курашга қўшилди

“Ливерпуль” ҳимоячиси Энди Робертсон ёзда эркин агентга айланади ва унга даъвогарлар сони ортиб бормоқда.

Журналист Жанлука Ди Марцио маълумотига кўра, “Ювентус” 31 ёшли шотландиялик футболчига расмий таклиф юборган. Шу билан бирга, футболчи учун асосий фаворит ҳали ҳам “Тоттенхэм” бўлиб турибди.

Робертсон 2017 йилдан бери “Ливерпуль” сафида тўп тепиб келаётганди. У мавсумнинг сўнгги уй ўйинидан кейин “Энфилд” билан хайрлашди.

Манбага кўра, “Тоттенхэм” футболчи билан деярли келишувга эришган, аммо “Ювентус” вазиятни ўзгартиришга умид қилмоқда.

Турин клубининг қизиқиши ҳимоя чизиғини кучайтириш зарурати ва Чемпионлар лигаси йўлланмаси учун курашдаги муваффақиятсизлик ортидан бюджет чеклангани билан изоҳланмоқда. Шу сабабли эркин агент трансфери “Ювентус” учун жуда жозибали вариант ҳисобланяпти.

Бироқ Робертсоннинг ҳозирги формаси борасида саволлар ҳам мавжуд. У ўтган мавсум АПЛда 1200 дақиқадан камроқ вақт майдонда ҳаракат қилди, “Ливерпуль” ҳимояси эса барқарор ўйин намойиш эта олмади.

Футболчининг келажаги Жаҳон чемпионати бошланишидан олдин ҳал бўлиши кутилмоқда.