“Ювентус” тўполон кўтарган Аллегрини ишдан ҳайдаб юборди

“Ювентус” клуби бош мураббий Массимилиано Аллегри истеъфога чиқарилганини расман эълон қилди.

- Истеъфо Италия кубоги финалидаги воқеалар оқибатидир. Раҳбарият клуб вакилларининг бундай хатти-ҳаракатларини “Ювентус” қадриятларига тўғри келмайди, деб ҳисоблайди.

2014 йилдан бошланган ва 2021 йилда қайта тикланган ҳамда сўнгги уч мавсум давом этган ҳамкорлик Италия кубоги финалидан кейин тўхтатилди.

Клуб Массимилиано Аллегрига келажакдаги лойиҳаларида муваффақият тилайди, - дейилади “Ювентус” баёнотида.

Маълумки, Италия кубоги финалида “Ювентус” футболчилари “Аталанта” устидан 1:0 ҳисобида ғалаба қозонди. Ўйиннинг сўнгги дақиқаларида бош ҳаукам Фабио Маресканинг “Ювентус” ҳимоячиси Бремерга нисбатан ишлатилган қўполликни дарҳол аниқламагани Массимилиано Аллегрини жумбушга келтирди.

Тажрибали мураббий костюмини ечиб отди, ёрдамчи ҳакамга бақирди. Бош ҳакам унга қизил карточга кўрсатди.

Аллегри Турин клубини 2021 йилнинг май ойидан бери бошқариб келаётган эди. Бу давр ичида туринлик футболчилар унинг қўл остида 149 та учрашувда қатнашиб, 80 та ғалаба, 34 та дуранг ва 35 та мағлубият қайд этди.