“Ювентус”да ўйнаган Зейтуллаев Шомуродовга қандай маслаҳат берди?

Италияда Элдор Шомуродовнинг машҳурлиги тобора ошиб бормоқда. “Женоа” таркибида муҳим фигуралардан бирига айланиб бораётган ўзбек футболчиси бошқа клубларнинг эътиборига тушиб улгурганига ҳам ҳеч қандай шубҳа йўқ.

Ҳозир кўп мутахассис ва мухлислар Элдор Шомуродовга “Ювентус” эътибор қаратгани тўғрисидаги янгиликни изоҳлаш, бу хабарга нисбатан ўз фикр-мулоҳазаларини билдириш билан машғул.

131895634_4147684591909096_383121433571040860_o

Хусусан, Италия яшил майдонларига биринчи бўлиб қадам қўйган ўзбекистонлик футболчи Илёс Зейтуллаев ҳам “Ювентус”нинг Элдор Шомуродовга қизиқаётгани ҳақидаги шов-шувларга ўз муносабатини билдирди.

- Бу хабарни эшитиб, жуда қувондим. Чунки бу Ўзбекистон учун муҳим воқеа. Бизнинг футболчиларга гранд клублардан қизиқиш бўлаётгани ҳақидаги хабарлар ҳар доим ҳам чиқавермайди.

Мен ўз ҳамюртимга, умуман олганда, ҳар қандай хорижлик футболчига Италия чемпионатига келиб, бу ерда ўрнашиб кетиш нақадар қийин ва мураккаб эканини яхши биламан.

Мен Элдорга қанчалик қийин бўлишига қарамай, ҳар бир машғулот, ҳар бир учрашувда ўзини кўрсатишини маслаҳат бераман ва шуни тилайман. Шукрки, ҳозир у бунинг уддасидан чиқмоқда. Охирги ўйинларда зўр ўйнаяпти, жисмоний ва психологик томондан ўзини тиклаб олган, у ҳақида ижобий фикрлар янграмоқда.

Мен мутахассис ёки инсайдер эмасман, лекин тажрибамдан келиб чиқиб айтишим жоизки, бу ҳаётда ҳамма нарса юз бериши мумкин.  “Ювентус” қизиқаётгани ҳақида ташқарига маълумот чиқдими, демак бу борада клуб ичида гап бўлган, чунки туринликлар Альваро Моратага ўринбосар қидираётгани аниқ.

Элдор – жуда иқтидорли футболчи. Агар у ҳозир кўрсатаётган даражада юқори сифатли ўйин намойиш қилса, кучли клубларга ўтиш имконияти ҳам бўлади.

Ҳозир, Шомуродов учун “Женоа”даги жойини мустаҳкамлаб олиши ва ҳозиргидай яхши ўйин намойиш қилиш жуда муҳим. Шунда унга “Лацио”, “Милан”, “Интер” ва “Ювентус” каб клублардан таклифлар бўлади, турли вариантлар юзага келади.

Менинг шахсий фикрим шуки, Элдорга гранд клублар қизиқа бошлагани унинг машаққатли меҳнатлари самарасидир. Сенинг агентларинг энг зўри бўлиши мумкин, лекин ўзинг футбол ўйнай олмасанг, уларнинг ҳеч қандай фойдаси тегмайди, чунки агентлар ўрнингга майдонга тушмайди, - дейди Илёс Зейтуллаев.

15485855

Илёс Зейтуллаев 2001 йили “Ювентус”нинг ёшлар жамоасига қабул қилинган. Туринликларнинг асосий жамоаси таркибида Италия кубоги доирасида икки марта майдонга тушди. Бир неча маротаба расмий учрашувлар қайдномасига киритилганига қарамай, Илёс “Ювентус”нинг асосий жамоасида ўзини кўрсатиш имконига эга бўлмади.

2005 йили “Ювентус”ни тарк этган ўзбекистонлик футболчи, кейинчалик “Реджина”, “Кротоне”, “Женоа”, “Виченца”, “Верона”, “Пескара”, “Виртус Ланчано”, “Торино” аъзосига айланди. Хорватиянинг “Горица” клуби таркибида олти учрашувда майдонга тушди.

Илёс Зейтуллаев 2001-2007 йиллар давомида Ўзбекистон миллий терма жамоаси сафида ўнта учрашувда иштирок этиб, рақиблар дарвозасига иккита гол киритган.

Маълумотларга қараганда, Зейтуллаев айни пайтда “Купелло” клубининг ўсмирлар жамоасига мураббийлик қилмоқда.

“Женоа” мухлислари Шомуродовнинг “Ювентус”га ўтишига қарши: Бизда Роналду ҳам ўзини кўрсата олмасди!

Шомуродовни “Ювентус”га жойлай оладиган мутахассислар бор!

Матнда хатолик топсангиз, ўша хатони белгилаб, бизга жўнатинг (Ctrl + Enter)