Зидан Франция терма жамоаси бош мураббийи бўлади

Афсонавий футболчи ва мураббий Зинедин Зидан 2026 йилги жаҳон чемпионати якунланганидан сўнг Франция терма жамоасини бошқаради. Бу ҳақда журналист Фабрицио Романо ўзининг X тармоғидаги саҳифасида маълум қилди.

Аввалроқ хабар қилинганидек, Франция терма жамоаси жаҳон чемпионати ярим финалида Испанияга 0:2 ҳисобида мағлуб бўлди. Энди жамоа учинчи ўрин учун майдонга тушади. Турнир якунлангач, 14 йилдан буён терма жамоага бошчилик қилиб келаётган Дидье Дешам ўз лавозимини тарк этади.

Ҳозир 54 ёшда бўлган Зиданнинг сўнгги иш жойи Испаниянинг "Реал" клуби бўлган. У мадридликларни 2016–2018 йиллар ҳамда 2019–2021 йиллар орасида бошқарган. Унинг қўл остида "Реал" уч марта Чемпионлар лигасида ғолиб чиққан, икки марта Испания чемпиони ва икки бор мамлакат Суперкубоги соҳиби бўлган.

Футболчи сифатида Зидан Франциянинг "Канн", "Бордо", Италиянинг "Ювентус" ҳамда "Реал" клубларида тўп сурган. "Реал" таркибида 2003 йилда Испания чемпиони бўлган, 2002 йилда эса Чемпионлар лигаси финалида Германиянинг "Байер" жамоаси дарвозасига ҳал қилувчи голни урган (2:1). "Ювентус" билан бирга икки марта Италия чемпионига айланган.

Франция терма жамоаси сафида Зидан 108 ўйин ўтказиб, 31 гол урган ва 29 голли узатма амалга оширган. У 1998 йилда жаҳон чемпиони, 2006 йилда жаҳон вице-чемпиони, 2000 йилда эса Европа чемпиони бўлган.