Зидан Франция терма жамоасини "Реал" услубида ўйнатадиган бўлди

Франция терма жамоасининг янги бош мураббийи Зинедин Зидан жамоа унинг қўл остида қай тарзда ўйнашини маълум қилди.

- Менинг ўйин услубимни яқин орада кўрасиз. Бу ҳақда сентябрь ойидаги матбуот анжуманида батафсил гаплашамиз. Ўша ерда ўз ғояларимни қисқача тушунтириб бераман. Ҳаммасини муҳокама қилишга вақт бўлади. Услубим “Реал”да қилаётган ишимга ўхшаш бўлади. Франция терма жамоаси менинг мураббийлик йўлимнинг мантиқий давоми, — деди Зидан.

Унинг таъкидлашича, унга энг катта илҳомни айнан ўйиннинг ўзи беради.

- Мен 10-рақам остида ўйнаган футболчи бўлганман. Мени доим илҳомлантирган нарса — гол уриш истаги. Албатта, бутун жамоа мувозанати ҳам жуда муҳим. Мен ўйинни яхши кўраман. Фаолиятимни Францияда бошлаганман, сўнгра 25 йилни Испанияда ўтказдим — бу нима англатишини ўзингиз ҳам яхши тушунасиз, — дея қўшимча қилди мутахассис.

Зидан сўзларига кўра, у майдонда етакчи бўлгани каби, энди тажрибасига таяниб, шу ролни мураббий сифатида давом эттирмоқчи.

- Майдонда етакчи эдим, энди эса ўз тажрибам орқали мураббий сифатида ҳам етакчи бўлишни истайман. Бизда барча шароит бор: ажойиб футболчилар, яқин вақтда шаклланадиган мураббийлар штаби. Менинг етакчи сифатидаги асосий вазифам — ушбу жамоа ғалабаларини давом эттиришини таъминлаш, — дея Зидан сўзларини Франция футбол федерациясининг расмий сайти келтиради.

Эслатиб ўтамиз, сешанба, 28 июл куни Франция футбол федерацияси (FFF) 54 ёшли мутахассис билан шартнома имзоланганини эълон қилди. Келишув 2030 йилги жаҳон чемпионати якунлангунига қадар амал қилади.