Зидан Ла Лигада юбилей ғалабасини қўлга киритди

Кеча “Реал” Ла Лиганинг 3-турини сафарда “Бетис”га қарши ўтказди ва 3:2 ҳисобида ғалаба қозонди.

Эътиборлиси, бу “қироллик клуби” устози Зинедин Зидан учун Испания чемпионатида бош мураббий сифатида қозонилган 100-ғалаба бўлди. Франциялик мутахассисга бу натижани қайд этиши учун 147 та ўйин кифоя қилди.

Зидан “Реал”ни 2016 йилдан буён бошқариб келмоқда. Ўтган давр мобайнида Мадрид клуби икки бор (2016/17, 2019/20) мамлакат чемпионлигини тантана қилди.