"Зўр ўйинчи эмасман, лекин..." ёхуд клубини тарк этган легионеримизни энди Қувайт ва Қатар жамоалари ўз сафларига чорлашмоқда

Кеча хабар берганимиздек, Тожикистоннинг “Истиқлол” клубида тўп сурган ҳамюртимиз Муҳаммад Исаев шартномани бекор қилди ва жамоани тарк этди.

Мавсум бошида Тожикистон чемпиони сафига қўшилган ярим ҳимоячи фаолиятида илк бор Осиё Чемпионлар лигасида тўп суришга муваффақ бўлди ва дебют голини ҳам уришга эришди. Шунингдек, Тожикистон чемпионатида ҳам бир қатор учрашувларда қатнашди. Орада эса жароҳат туфайли маълум вақт жамоасига ёрдам бера олмади.

Исаев Sports.uz мухбирига “Истиқлол”даги фаолияти қандай кечгани, нима учун кетгани ва янги чақириқлар тўғрисида фикр билдирди.

“Кўп клублар кўрпага қараб оёқ узатишади”

- Авваламбор, “Истиқлол”га ҳаммаси учун катта раҳмат. У ерда ҳаммаси зўр. Тожикистон чемпионатида бу жамоа якка пешқадам. Шароитлар ҳам “Истиқлол”да жуда яхши. Қолган клубларда эса унчалик эмас. Савияси бўйича Ўзбекистон чемпионатидан пастроқ экан. Молиявий ҳолатлари зўр эмас. Шу сабабли у ерда кўп клублар кўрпага қараб оёқ узатишади. Ўзимдан қониқиш ҳосил қилганим йўқ.

“Истиқлол” билан дўстона хайрлашдик”

- Шартномам йил охиригача эди. Биринчи марта легионер бўлиб ўйнадим. Уйдан узоқда тўп суришга унчалик ўрганмагандим. Ўзбекистон чемпионати кучли. Энди вазиятга қараб иш тутамиз. Балки ўзимизни чемпионатга қайтарман, балки яна четда ўйнарман. Ҳозирча бир-иккита вариантлар бор, шуларни кўриб чиқамиз. “Истиқлол” раҳбарияти билан гаплашдим ва биз дўстона хайрлашдик. Уларга вазиятни тушунтирдим. Икки томонлама келишган ҳолда кетдим.

“Муҳаммадиев келгач, мукофот пули ҳам йўлга қўйилди”

- Клубимизда мукофот пули чемпионат бошида йўқ эди. Кейин “Бухоро”да ишлаган Муҳсин Муҳаммадиев жамоада иш бошлаганидан сўнг, мукофот пули ҳам йўлга қўйилди. Лекин Ўзбекистондагига нисбатан анча кам. Ойлик маош яхши, ёмон эмас. Кўз тегмасин, “Истиқлол”га ҳаммаси учун раҳмат. Барчасини вақтида қилиб берди. Пулдан ва шароитдан муаммо йўқ. Бунинг учун “Истиқлол” раҳбариятига раҳмат.

“Эронлик агент билан ишлаяпман”

- Ростини айтадиган бўлсам, яна четда легионер сифатида тўп суриш ниятим бор. Ҳа, Ўзбекистондан ҳам вариантлар бор. Лекин мени кўпроқ хориж клублари қизиқтиряпти. Айни пайтда Таиланд, Кувайт ва Қатар чемпионатларидан таклифлар бўляпти. Эронлик агент билан бирга ишлаяпман. Осиё Чемпионлар лигасидан кейин танишиб қолгандик ва бирга ишлаш нияти борлигини айтганди. Ҳозирча агентим менга айнан қайси клублардан қизиқишлар борлигини айтгани йўқ.

“Металлург”да қадримга етишмади”

- Жалолиддин Машарипов Sports.uz сайтига интервью берганида легионер футболчи ўйинни ўзи қилиши керак, масалан, Рўзиқул ака Бердиев “Насаф”да кимни қўйса, ўйинчилари бемалол ўйнаб кетаверади, деб айтганди. Рост гап экан. Легионер футболчи ўйинни ўзи қилиши керак. Чунки хорижлик ўйинчидан икки ҳисса кўпроқ талаб қилинади. Легионер бўлгач, эътибор ҳам кучлироқ бўлади. Ўзимизда АГМКда ўйнадим, у пайт анча ёш эдим. “Металлург”да эса унчалик қадримга етишмади (кулади).

“Фаолиятимни тугатгач, мени яхши сўзлар билан эслашларини хоҳлайман”

- Ўз олдимга реал қўйган вазифам – яхши футболчи бўлиш. Фаолиятимни тугатганимдан кейин мени яхши сўзлар билан эслашларини хоҳлайман. Тўғри, мен зўр ўйинчи эмасман. Лекин ўзимга яраша орзуларим бор. Терма жамоа билан жаҳон чемпионатига чиқишни жуда ва жуда истайман.