"Andijonlik muxlislar yuksak hurmatga sazovor, bir-ikkita pozitsiyalarimizni kuchaytirish lozim" - Dragan Cheran

  • 4 iyun, 2024, 12:15
  • Shuhratbek Jo’rayev
  • 0
  • Futbol
TIGGO 2 PRO

“Paxtakor” Superliganing 10-turida “Andijon” maydonida qiyin, ammo juda muhim g‘alabani qo‘lga kiritdi. “Sherlar” sardori va etakchisi Dragan Cheran uchrashuvga nuqta qo‘ygan uchinchi gol muallifi bo‘ldi. U 37 yoshida ham gol urishdan to‘xtagani yo‘q va to‘purarlar orasida kurashni davom ettiryapti.

- Avvalambor, “Andijon”ga qarshi o‘yin haqida gaplashsak. Uchrashuv sizda qanday taassurot qoldirdi?

- Andijonda qiyin o‘yin bo‘lishini biz bilgandik. “Andijon” uyida ham yaxshi o‘ynaydi, ko‘p yuguradi va qattiq kurashadi. Lekin tarkibimizda ko‘p o‘zgarishlarga bo‘lganiga qaramay, biz “Paxtakor” ekanligimizni ko‘rsatdik va haqli g‘alaba qozondik.

- Stadiondagi atmosfera sizga yoqdimi? Hamma “Andijon” ishqibozlarini O‘zbekistonda birinchi raqamli deb gapiradilar. Bunga qo‘shilasizmi?

- Ha, bu rost. Shak-shubhasiz Superligadagi eng zo‘r muxlislar. Ular doim stadionda go‘zal atmosferani yaratishadi. Ularga mana shunday yuqori darajada qo‘llab-quvvatlashda davom etishlarini tilayman. Shuningdek, o‘yindan so‘ng bizni olqishlab kuzatib qo‘yishdi, buning uchun katta rahmat. Andijonlik muxlislar yuksak hurmatga sazovor.

- Superkubokdagi mag‘lubiyat “Paxtakor”ga salbiy ta’sir ko‘rsatadi, deb o‘ylashgandi. Lekin bunday bo‘lmadi. Ayting-chi, jamoa o‘sha mag‘lubiyatdan keyin qanday ruhlandi?

- Futbolda asosiysi, keyingi o‘yinni o‘ylash kerak. O‘tgan ishlarni o‘ylamasdan, tushkunlikka tushmasdan faqat oldinga qarab intilish lozim.

- “Andijon”ga qarshi bahsda siz Superligadagi 100-golingizni urganingizni bilganmidingiz va buni qanday qabul qildingiz?

- Albatta, Superligada “Paxtakor” uchun 100-golimni urganimdan juda xursandman. Mana shu tempda oldinga qarab harakat qilishda davom etish kerak.

- Ikkinchi davrada “Paxtakor” tarkibi yanada kuchaytirilishi kerak deb hisoblaysizmi?

- Ha, biz raqobatdosh jamoa bo‘lishini istasak bir-ikkita pozitsiyalarimizni kuchaytirishimiz lozim. Ishonamanki, rahbariyatimiz va murabbiylar buni amalga oshirishadi.

- To‘purarlar ro‘yxatida raqobat ko‘rsatyapsiz. Shu yoshingizda hali ham gol uryapsiz. Yana to‘purar bo‘lish vazifangiz bormi?

- Shu yoshga etib to‘purarlikda raqobat qilayotganimdan xursandman. Bundan keyin ham jamoamning g‘alabalariga o‘z hissamni qo‘shishga va yosh futbolchilarimizga buyuk o‘yinchi bo‘lib etishishlariga yordamlashaman.   

Shuhratbek Jo‘raev.

 

Fikrlar

Fikr qoldirish uchun avtorizatsiyadan o'ting!