"Andijon"ning sentyabr oyidagi eng yaxshi futbolchisi aniqlandi

Har oyning eng yaxshi futbolchisi nomini aniqlab, unga maxsus sovg‘a topshirish marosimi jamoamiz tomonidan alohida an’ana tusiga kirgan.

Sentyabr oyidagi har bir uchrashuvdan so‘ng klub rasmiy telegram kanali orqali muxlislar o‘rtasida eng yaxshi futbolchiga ovoz berish jarayonlari o‘tkazildi.

Umumiy ko‘rsatkich bo‘yicha “Andijon”ning sentyabr oyidagi eng yaxshi futbolchisi nominatsiyasida bu safar Suhrob Berdiev tengsiz deb topildi. U yakuniga etgan oyda muxlislar tomonidan 1639 ovozga ega bo‘ldi.

Ta’kidlash kerakki, Berdiev safarda “Mash’al” hamda “Buxoro” klublariga qarshi o‘ta muhim bellashuvlarda gollar urib jamoamizning g‘alabasiga katta hissa qo‘shdi.

Berdievdan keyingi o‘rin darvozabon Eldor Adhamovga nasib qildi. U 1014 ta ovoz to‘pladi. Uchinchi o‘rin Shahboz Erkinovga tegishli bo‘ldi. Hujumchi 968 ovoz oldi. Qizig‘i, Farhod Sohibjonov undan bitta ovoz kam to‘pladi – 967 ta. Kuchli beshtalikni chernogoriyalik legioner Goron Miloyko yakunlab berdi. Uning hisobida 889 ta ovoz mavjud.

Bugungi mashg‘ulotdan oldin jamoamiz bosh murabbiyi Viktor Kumikov sentyabr oyining eng yaxshi futbolchisi nomiga atalgan maxsus statuetkani o‘z egasi – Suhrob Berdievga topshirdi.

“Andijon” matbuot xizmati.