Bahodir Jalolovga Amerikadan murojaat keldi!

Toshkent shahri ilk marotaba mezbonlik qilayotgan boks bo‘yicha kattalar o‘rtasidagi jahon chempionatini butun dunyodan boks mutaxassislari, murabbiylar, sportchilar, sport jamoatchiligi vakillari kuzatib bormoqda.

O‘ta og‘ir vazn toifasida Bahodir Jalolov va Qamshibek Kunkabaev o‘rtasidagi chorak final jangi hamon keng muhokama qilinmoqda.

Ma’lumki, ushbu jangda o‘zbek bokschisi qozog‘istonlik raqibini katta ustunlik bilan engdi. Ular o‘rtasidagi to‘qqizta jangdagi g‘alabalarini oltitaga etkazib olgan Bahodir Jalolov jahon chempionatining oltin medaliga asosiy da’vogar hisoblanadi.

Ashaddiy raqiblar – Jalolov va Kunkabaev to‘qnashuviga mashhur amerikalik promouter  Lu DiBella ham o‘z munosabatini bildirdi. Jang bo‘lib o‘tganiga bir necha kun bo‘lishiga qaramay, DiBella Twitter sahifasi orqali o‘zbek bokschisiga murojaat yo‘lladi.

- “Katta o‘zbek” – Bahodir Jalolovni O‘zbekiston poytaxti Toshkent shahridagi IBA jahon chempionati chorak finalida Qamshibek Kunkabaev ustidan qozongan g‘alabasi bilan tabriklayman, - deb yozdi amerikalik promouter.

Ta’kidlash lozimki, Lu DiBellaga tegishli “DiBella Entertainment” kompaniyasi Bahodir Jalolovning professional boksdagi hamkori hisoblanadi.

Mashhur sportchimiz professional ringda jami 12 ta jang o‘tkazib, ularning barchasida raqiblari ustidan muddatidan oldin g‘alaba qozongan.

Shuningdek, Bahodir Jalolov havaskor bokschilar o‘rtasida deyarli barcha nufuzli turnirlarda chempion bo‘lgan. Bahodir Olimpiya o‘yinlari, jahon va qit’a chempionatlarida oltin medallarni qo‘lga kiritgan. Hali birorta final uchrashuvida raqiblariga imkon bermagan boks ustasi hisoblanadi.

Bahodir Jalolov va Qamshibek Kunkabaev jangiga boshqa mutaxassislar, tashkilotlar, ekspertlar ham o‘z mulohasini bildirishda davom etmoqda.

Xususan, Xalqaro boks uyushmasi (IBA) matbuot xizmati ham ushbu to‘qnashuvga munosabat bildirdi.Tashkilotning instagramdagi sahifasiga Jalolovning Kunkabaevga yo‘llagan zarbalaridan lavha qo‘yib, “Jag‘! 10 balli tizimda baholang!”, degan post qo‘ydi.

Bu jang britaniyalik mashhur boks murabbiyi va eksperti Teylor O’Xiggins e’tiboridan ham chetda qolmadi. Mutaxassis uch raundda davom etgan jangni boshqargan hakamlar ishiga ham baho berib o‘tdi.

Ma’lumki, jangning uchinchi raundida hakam Kunkabaevga ikki marotaba ogohlantirish berdi.

- Bahodir Jalolov chorak final jangida Qamshibek Kunkabaevni hech qanday muammosiz mag‘lub etdi. Lekin referining ishi rasvo ekan. Uning ishidan qolgan achchiq ta’m, g‘alaba mazasini buzdi, - deb yozdi Teylor O’Xiggins Twitter sahifasiga.

Boks olamida o‘zbek va qozoq bokschilari jangi “el-klasiko”ga tenglashtiriladi. Uni o‘ta og‘ir vazn toifasidagi Jalolov-Kunkabaev to‘qnashuvlari ham bezab keladi. Bu raqobat 2015 yildan beri davom etib kelmoqda.

Hozircha, har ikki bokschi 9 marotaba o‘zaro kuch sinashgan. Umumiy natijaga ko‘ra, Bahodir Jalolov 6:3 hisobida oldinda.

Jalolov va Kunkabaev o‘rtasida 12 raundlik professional jangni kutilyapti

Yana Bahodir Jalolov haqida...

Jalolov: Birgalikda chempionlikka erishamiz!