Bahrom Haydarov: "Qizil kartochkalarni tartib-intizom bilan bog‘lamagan bo‘lardim"

“Qo‘qon-1912” Termizda “Surxon”ga qarshi uchrashuvni 11 futbolchi bilan boshlab 9 o‘yinchi bilan yakunladi. Natija 3:1 “Surxon” foydasiga. O‘yindan so‘ng qo‘qonliklar bosh murabbiyi Bahrom Haydarov matbuot anjumanida qatnashdi.

- O‘yinni boshida “Surxon” jamoasini oldinga tashlanishi aniq edi. Chunki uchta mag‘lubiyatdan so‘ng shunday o‘ynashini bilardik. Biz birinchi bosimni 15-20 daqiqa davomida ushlashimiz kerak edi. Buni uddasidan chiqdik. Lekin bitta vaziyatda gol o‘tkazib yubordik. Futbolda bitta gol o‘tkazib yuborish fojea emas. Ikkinchi bo‘limda yaxshi “nastroy” bilan chiqdik. Ikkla jamoa ham bir xil o‘yin ko‘rsatdi, deb o‘ylayman. Ikkinchi bo‘limni yaxshi boshladik. Yigitlar faqat g‘alaba uchun intilayotgandilar. Biroq ikkita qizil kartochka...Bittasidan keyin unchalik bilinmayotgandek edi, ammo ikkinchisidan so‘ng katta tashabbus raqibga o‘tdi. Shuni hisobiga oxirida kuchimiz etmay qoldi. 9 ga 11...To‘g‘ri, oxirigacha o‘ynashimiz kerak. Ammo buni uddalay olmadik.

- “Qo‘qon-1912” hisobni tenglashtirganida Bahrom Abdurahimov va yana bir futbolchini maydonga tushirmoqchi bo‘ldingiz. Hujumda rotatsiya qilmoqchi bo‘ldingiz. Bu nima bilan bog‘liq? Shuningdek, qizil kartochkalar jamoangizga xalaqit bergani bor gap. Lekin sariq va qizil kartochkalarning ko‘payib ketayotgani tartib-intizom bilan bog‘liqmi yoki boshqa omillar bormi?

- Tartib-intizom bilan bog‘lamagan bo‘lardim. Chunki ikkala qizil kartochka ham o‘yin epizodlaridagi vaziyatlar edi. 1:1 dan keyin Muhammadanas Hasanov bilan Beshimovni almashtirmoqchi edik, keyin gol urdik. Rejamizda ikkala o‘yinchini almashtirish holati bor edi. Oxirida Beshimov ham sariq kartochka oldi. Ammo futbolda bunday emotsiyalar bo‘lib turadi. Albatta, o‘yinchi o‘zini ushlashi kerak. Biroq bu yomon holat emas. Durang paytda yana bir hujumchi tushirish haqida kelsak, doim o‘yinimizdan kelib chiqamiz. Ammo durang bo‘lganida ham biz uchun yaxshi natija edi. Yutsak ham bo‘lardi. O‘zgarishlarga tayyorgarlik ko‘rayotganimizda biz bosim qilayotgandik. Shu bosimlarni yanada kuchaytirishni istadik. “Surxon” yosh jamoa va biroz dovdirab qolgandek bo‘lgandi. Biroq ulgurmay qoldik. Ikkinchi qizil kartochka ularga ruhan kuch berdi. Shuni hisobiga yutib ketishdi.

- “Surxon” Superligadagi yosh jamoa. “Qo‘qon-1912” tajovuzkor o‘yin ko‘rsatadi va ko‘proq hujumlar ko‘ramiz, deb o‘ylagandik. Lekin birinchi bo‘lim davomida “Surxon” tezkor gol urishga harakat qildi.

- Buni o‘rganib chiqamiz. Tajovuzkor futbol va g‘alaba uchun o‘ynashni doim tushuntirishga harakat qilyapmiz. O‘yinni tahlil qilish kerak, hozir savolga aniq javob bera olmayman. Albatta, buni ustida ishlaymiz.