“Barsa” kutgan yulduzcha maydonga qaytdi

Lionel Messidan keyin “Barselona”ning haqiqiy etakchisiga aylanishi kutilayotgan Ansu Fati o‘n oylik tanaffusdan keyin umumiy guruh mashg‘ulotlariga qo‘shildi.

Ansu Fati o‘tgan mavsumni juda muvaffaqiyatli boshlagan edi. 18 yoshli futbolchi La Liganing dastlabki ettita uchrashuvida raqiblar darvozasini to‘rt marotaba ishg‘ol qilgan. Biroq, og‘ir jarohat olib, 10 oy maydondan chetda yurdi.

Iste’dodli hujumchi umumiy guruhga qo‘shilgan bo‘lsa-da, unga ortiqcha yuklamalar berilmayapti. Xususan, Fati “Barselona”ning oldinda “Xetafe”ga qarshi o‘tkazadigan bahsida ham ishtirok eta olmaydi.