"Bunyodkor"ga 3 ta gol urgan "Qizilqum" chorak finalga yo‘l oldi

O‘zbekiston kubogi bahslariga start berildi. Bugun 1/8 final uchrashuvlari doirasida "Qizilqum" va "Bunyodkor" klublari keyingi bosqich yo‘llanmasi uchun kurash olib bordi. Bellashuv maydon egalarining 3:1 hisobidagi g‘alabasi bilan yakunlandi.

Hisobni birinchi bo‘lim so‘ngida Mirjamol Qosimov ochdi. Uning jarima maydoni tashqarisidan bergan zarbasini darvozabon qaytara olmadi. Ikkinchi taymda Jasur Azimov qarshi hujumda raqibni jazoladi. Birga-bir vaziyatga chiqib borgan futbolchi darvozabonning ojiz nuqtasini topa oldi.

O‘tkazib yuborilgan ikki goldan so‘ng, "Bunyodkor" safida darvozabon almashdi. Biroq 70-daqiqada Oleg Tolmasov ham uzoq masofadan zarab yo‘llab, yaqindagina maydonga tushgan posbonni ojiz qoldirdi va hisobni yirik ko‘rinishga keltirdi. Bu gollarga "qaldirg‘ochlar" Mirjahon Mirahmadovning birgina goli bilan javob bera oldi.