Futbol "bilimdon"lari maslahatdan tiyilsinlar! "Nasaf" prezidenti Berdievga oxirigacha ishonishini aytdi

Kecha Superliganing 17-turidan o‘rin olgan “Nasaf” — “Lokomotiv” uchrashuvining so‘ngi daqiqalarida jamoamiz bosh murabbiyi Ro‘ziqul Berdievning uchrashuv bosh hakamiga e’tiroz bildirgani bugun OAV va keng jamoatchilikda muhokamaga sabab bo‘ldi. Ushbu voqeaga Sho‘rtan gaz-kimyo majmuasi direktori, “Nasaf” futbol klubi prezidenti Shuxrat Aslanov ham o‘z munosabati bildirdi:

- Ro‘ziqul Berdiev o‘zi xohlagan muddatgacha klubda faoliyat olib boradi. Klub rahbariyati unga va murabbiylar shtabiga to‘liq ishonadi. "Nasaf" Ro‘ziqul Berdiev bilan O‘zbekiston chempionatining to‘rt karra bronza, ikki karra kumush medallari, ikki karra O‘zbekiston Kubogi va bir marta O‘zbekiston Superkubogini qo‘lga kiritganini jamoamiz muxlislari esdan chiqarmasliklari kerak, deb o‘ylayman. Kechagi bellashuvdan so‘ng “Nasaf” va uning atrofida klub nomi orqali o‘ziga e’tiborni jalb qiluvchilar ko‘payganligi va bu aynan klubning oxirgi yillardagi omadli ishtiroki sababli deb bilaman. So‘nggi paytlarda klubimiz haqida “qayg‘urayotgan” turli futbol “bilimdon” laridan maslahatlardan biroz tiyilishlarini so‘rab qolardim.

- Jamoamiz joriy mavsumda milliy chempionatimizda chempionlik uchun kurashmoqda va bu yilgi chempionat har qachongidan ham qizg‘in kechmoqda. Jamoa xalqaro maydonda ham yurtimiz sharafini munosib himoya qildi va pley-off bosqichiga yo‘llanmani qo‘lga kiritdi. Shu sababli jamoamizning haqiqiy muxlislaridan biroz sovuqqon bo‘lishlarini, har qanday holatda ham futbolchilar va murabbiylar shtabini qo‘llab-quvvatlashlarini so‘rab qolaman. Zero, haqiqiy muxlis, omad kelmaganida ham o‘z sevimli jamoasini qo‘llab-quvvatlashi lozim”.

                                                                                                                                        "Nasaf" matbuot xizmati