Modrichning 10-raqamini kim olishi mumkinligi ma’lum

Madridning "Real" klubi Kilian Mbappega 10-raqamli libosni berish variantini ko‘rib chiqmoqda. Bu haqda Marca nashri xabar bermoqda.

Manbaga ko‘ra, "qaymoqranglilar" rahbariyati bu raqam frantsuz hujumchisining imidjini yanada oshirishiga ishonmoqda. Shuningdek, 10-raqam Mbappening jamoaning bosh yulduzi sifatidagi maqomini bildirib turadi.

Hozirda 26 yoshli futbolchi 9-raqam ostida harakat qilmoqda. Luka Modrich esa Klublar o‘rtasidagi jahon chempionatidan keyin "Real"ni tark etadi va 10-raqam bo‘sh qoladi.

O‘tgan mavsumda Mbappe barcha musobaqalarda 56 ta o‘yinda maydonga tushib, 43 ta gol urdi va 5 ta golli uzatma amalga oshirdi. Uning klub bilan amaldagi shartnomasi 2029 yil yozigacha mo‘ljallangan. Transfermarkt portali ma’lumotiga ko‘ra, futbolchining bozor bahosi 180 million evroni tashkil etadi.