Nufuzli nashr Jahon chempionatida ishtirok etuvchi eng kuchli futbolchilar ro‘yxatini tuzdi. O‘zbekistondan kim bor?

Nufuzli "The Athletic" nashri mutaxassislari kelayotgan 2026 yilgi jahon chempionatida 1,200 dan ziyod ishtirok etuvchi futbolchilar orasidan eng zo‘r 100 tasini saralab, kuchli yuztalik ro‘yxatini shakllantirishdi. 

Ushbu ro‘yxatning e’tiborli jihati shundaki, o‘z tarixida ilk bor mundialda ishtirok etayotgan O‘zbekiston terma jamoasidan faqat bir nafar futbolchi ushbu reytingdan o‘rin olgan. "Manchester Siti" sharafini himoya qilayotgan himoyachimiz Abduqodir Husanov Takefuso Kubo, Mateush Kunya, Kauro Mitoma, Gilberto Mora, Din Xausen, Aleksandr Pavlovich, Ugo Ekitike, Rodrigo Goes, Estevao, Nikolas Jekson, Mark Andre ter Shtegen, Pau Kubarsi, Eduardo Kamavinga va Martin Subimendi kabi futbol yulduzlarini ortda qoldirib, ro‘yxatda 86-o‘rinni band etdi.

OFK terma jamoalari a’zolaridan faqatgina Mehdi Taremi (51) va Son Xyon Min (37) Abduqodirdan yuqori pog‘onalardan joy egallashdi. 

Kuchli 10 talikda Kilian Mbappe, Erling Xoland, Lamin Yamal, Xarri Keyn, Pedri, Jud Bellingem, Vinisius Junior, Lionel Messi, Kevin de Bryuyne va Janluiji Donnarumma kirishdi. 40 yoshli Portugaliya terma jamoasi sardori Krishtianu Ronaldu bor yo‘g‘i 25-o‘ringa qo‘yildi.