“Oshni damlaganlar chetda qolib, hamma aybni Sport kanaliga osib qo‘yishadi”OChL translyatsiyasi masalasi nima bo‘lyapti?

SPORT TV jurnalisti va sharhlovchi – Otabek Jo‘raev o‘z telegram kanalida OChL translyatsiyasi masalasiga oid post qoldirdi. Unga ko‘ra, voqealar rivoji shu tempda borsa, o‘yinlar telekanallar orqali namoyish etilmasligi ham hech gap emas.

“Demak, "Osiyo chempionlar ligasi O‘zbekistonda" serialining navbatdagi qismi

O‘zbekistonning xususiy telekanali o‘yinlarni translyatsiya qilishdan bosh tortganidan so‘ng, bu huquqlarni O‘zbekistonga sotgan kompaniya Sport telekanali bilan aloqaga chiqib, joriy mavsumdagi OChL huquqini sotib olishni taklif qildi. Eng qizig‘i, ular ushbu mavsum uchun bitta turnir uchun huquqlarni taklif qilishdi-ku, summani esa oldingi 4 mavsumdagi barcha turnirlar uchun so‘rashdi. Ya’ni emagan somsaga pulni biz to‘lashimiz kerak ekan. Kulgili

Ammo bu muammoning yarmi

Qo‘shimchasiga biz O‘zbekistondagi to‘rtta stadiondan o‘z imkoniyatlarimizdan kelib chiqib emas, balki OFK talablaridan kelib chiqqan holda mahalliy translyatsiyalarni taqdim etishimiz lozim. Va bu bizdagidan ko‘ra ko‘proq kameralar va ularning barchasi HD formatda, VAR tizimi va boshqa texnik talablar. Ya’ni biz o‘zaro summani kelishib olsak ham, ishonchim komilki, huquq egasi miqdorni kamaytirardi, ammo texnik jihatdan qisqa vaqt ichida biz kerakli televizion tasvirni yaratish imkoniga ega emasmiz

Natijada, huquq egalarining o‘zlari televizion rasm yaratish bilan shug‘ullanishlari kerakligi ma’lum bo‘ldi. Va bilasizmi endi nima bo‘ldi? O‘zbekistonga sotayotgan translyatsiya huquqlarining oraliq egasi (vositachi) “telekartink”ni tayyorlashdan bosh tortdi va huquqlarning asosiy egasiga jarima to‘lashga tayyor. Bu ularga ancha arzonroqqa aylanadi

Uyog‘i nima bo‘larkin, a?

Buni aniq bilmayman. Oldin yozganimdek, faqatgina ijobiy natijaga umid qilamiz. Ammo hozirgina aniq aytishim mumkin, agarda, mabodo O‘zbekiston tomoshabinlari futbolsiz qolsa, oshni damlaganlar chetda qoladi, hamma ayblar esa odatdagidek Sport TV ga osib qo‘yishadi. Javob”

Eslatib o‘tamiz, avvalroq UzReport kanali OChL bahslarini jonli namoyish etmoqchi emasligi borasida xabar bergan edik. Voqealar rivojini SPORTS.uz bilan kuzatib boring.