O‘zbek sportining yorqin g‘alabalari aks etgan hujjatli film tasvirga olinadi

Bu yil mamlakatimiz bo‘ylab O‘zbekiston Respublikasi davlat mustaqilligining 30 yilligi keng nishonlanadi. Eng ulug‘ va eng aziz bayram arafasida mustaqil O‘zbekistonning istiqlol yillarida turli sohalarda erishilgan yutuqlari ifoda etilgan turkum kinosolnomalar va hujjatli filmlar tayyorlanishi rejalashtirilmoqda. Bundan ko‘zlangan maqsad – yutuqlar o‘z-o‘zidan kelmayotganligi, unga qancha zahmatlar chekib, mashaqqatli mehnatlar natijasida erishilayotgani hamda buning ortida kimlar turganini xalqqa etkazishdan iborat.

 

Shu maqsadda o‘zbek sportining yorqin g‘alabalari aks etgan hujjatli film tayyorlanishi rejalashtirilmoqda. Bu haqda Jismoniy tarbiya va sport vazirligi hamda Milliy olimpiya qo‘mitasi rahbariyati ishtirokidagi o‘tkazilgan onlayn yig‘ilishida ta’kidlandi.

Yig‘ilishda Jismoniy tarbiya va sport vazirining birinchi o‘rinbosari Ravshan Ermatov, vazir o‘rinbosari Nodir Murotov, MOQ raisi Rustam Shoabdurahmonov, MOQ Bosh kotibi Oybek Kasimov, shuningdek vazirlik va qo‘mitaning boshqarma boshliqlari ishtirok etdi. Suhbatda 2021 yil yurtimizda bo‘lib o‘tishi kutilayotgan xalqaro musobaqalar, ularning tashkiliy masalalari, yil davomida soha oldiga qo‘yilgan vazifalarni bajarish rejalari ko‘rib chiqildi.

Shuningdek, yig‘ilish davomida yaqin orada o‘tkazilishi kutilayotgan dzyudo bo‘yicha Toshkent “Katta dubulg‘a” turniri, “Navro‘z” xalqaro marafoni, professional bokschimiz Murodjon Ahmadalievning chempionlik kamarlarini himoya qiluvchi jangiga puxta tayyorgarlik ko‘rish, ular doirasida xalqaro sport tashkilotlari rahbariyatini ham yurtimizga taklif qilib, o‘zaro hamkorlik aloqalarni yanada mustahkamlash borasida atroflicha fikr-mulohazalar bildirildi.