Pro liga. So‘nggi turda qayd etilgan natijalar bilan tanishing!

Pro liganing 2023 yilgi mavsumi yakunlandi. Bu mavsum chempionligini "Lokomotiv" 48 ochko bilan qo‘lga kiritdi. Samarqandning "Dinamo" klubi 41 ochko bilan ikkinchi o‘rinni egalladi. 

So‘nggi turda muxlislar "Navbahor-Farm" - "Lokomotiv", "Yunired" - "Aral", "Sho‘rtan" - "Dinamo", "Mash’al" - "Xorazm" va "G‘ijduvon" - Qo‘qon-1912" qarama-qarshiliklari guvohi bo‘ldi.

"Navbahor-Farm" - "Lokomotiv" bahsi mehmonlarning 3:1 hisobidagi g‘alabasi bilan yakunlandi. Gollarga Ali Abdurahmonov 21 (0:1), Anvar Alijonov 37 (0:2), Ali Abdurahmonov 43 (0:3) va Alijon Alijonovlar 47 (1:3) mualliflik qildi.

"Yunired" - "Aral" o‘yini 1:1 hisobidagi durang bilan tugadi. Asomiddin Mamatov 88-daqiqada hisobni ochgan bo‘lsa, Norxon Sheripov, 93-daqiqada hisobni tenglashtirdi. "Aral" a’zosi Damir Nizanov 70-daqiqada qizil kartochka olib maydonni erta tark etdi.

"Sho‘rtan" - "Dinamo" bahsi ancha qizg‘in kechdi. Unda g‘uzorliklar 2:1 hisobida g‘alaba qozondi. Zafar Polvonov 78-daqiqaga kelib hisobni ochgan bo‘lsa, Dushan Miyich 90+14da o‘z darvozasini ishg‘ol qilib qo‘ydi (2:0). Javlonbek Malikov 90+16-daqiqada penaltidan gol urdi. Bundan tashqari, Zafar Polvonov bugun futbolchilik faoliyatini yakunladi. 

"Mash’al" - "Xorazm" uchrashuvida Kamronbek Abdulhamidov 72-daqiqada kiritgan goli o‘yin taqdirini hal qildi. Bu gol  "Mash’al"ga g‘alaba keltirdi.

"G‘ijduvon" - Qo‘qon-1912" o‘yinida "otishma" bo‘ldi. Qo‘qon jamoasi raqib darvozasiga 8ta gol urdi va o‘z darvozasidan bitta to‘p olib chiqdi. Gollarga Doniyor Ismailov14 (0:1), Doniyor Ismailov 52 (0:2), Anvarjon Hojimirzaev 63 (0:3), Anvarjon Hojimirzaev 66 (0:4), Temur Tulegenov 67 (1:4), Murodjon Komilov 71 (1:5), Shahzod Beshimov 77 (1:6), San’at Shixov 78 (1:7), Avazxon Mamatxo‘jaev 83 (1:8) mualliflik qildi.

Turnir jadvalidagi holat quyidagicha: