Robertson: "Jamoa etakchilari bizdan hushyorlikni yo‘qotmaslikni so‘radi"

"Liverpul" himoyachisi Endryu Robertson jamoa etakchilari "Manchester Yunayted"ga qarshi mag‘lubiyatdan keyin futbolchilarni xotirjam bo‘lishga chaqirganini ma’lum qildi.

"Mag‘lubiyatlar seriyasi boshlanganda, uni iloji boricha tez to‘xtatish juda muhim. Biroq "Manchester Yunayted"dan keyin jamoa etakchilari: "Panikaga tushmanglar", dedi.

Biz doimo kiyinish xonasida gaplashamiz — hatto beshta o‘yinni ketma-ket yutgan paytlarimizda ham. Bu biz uchun oddiy holat, o‘yinlardan keyin katta yoki kichik guruhlarda fikr almashamiz.

Bu hech qanday xavotir emasdi, balki: "Shunday davom etinglar, diqqatni yo‘qotmanglar, biz birdam bo‘lsak, hammasi o‘zgaradi", degan ruhdagi so‘zlar edi.

Bizning jamoada mahorat darajasi juda yuqori, agar biz har kuni shuni namoyon qila olsak, muvaffaqiyatga erishamiz.

Biroq "Ayntraxt"dan keyin hammamiz xotirjam bo‘ldik. Biz faqat mag‘lubiyatlar seriyasini to‘xtatganimiz va 5:1 hisobida g‘alaba qozonganimizdan xursandmiz. Hech qanday katta reaktsiya bo‘lmadi", – dedi "Liverpul" himoyachisi.

Eslatib o‘tamiz, mersisaydliklar yakshanba kuni o‘z maydonida "Manchester Yunayted"ga (1:2) yutqazib, to‘rtinchi marta ketma-ket mag‘lub bo‘lishdi. Biroq, chorshanba kuni "Liverpul" Chempionlar ligasida "Ayntraxt"ni yirik (5:1) hisobda taslim etdi.