Ronaldу Ispaniyaga qarshi oʻyin oldidagi bosim haqida: "Meni 23 yildan beri yoʻq qilishga urinishmoqda"

Португалия терма жамоаси етакчи ҳужумчиси Криштиану Роналду ЖЧ-2026 мусобақасининг 1/8 финалида Испанияга қарши бўладиган учрашув олдидан ўз фикрларини билдирди.

– Мен Испанияни жуда яхши кўраман. У ерда уйларим, бизнесим бор. Дўстларим – испанлар. Оилам ҳам деярли испан оиласига ўхшайди, – деди Роналду.

Унинг таъкидлашича, Испания ҳар доим барча мусобақаларда ғалаба учун курашадиган жамоа сифатида кўрилади.

– Испания ҳар қандай турнирда чемпионликка даъвогар. Ҳозир ҳам, назарий жиҳатдан, фаворит ҳисобланади. Чунки у аллақачон кўп марта ғолиб чиққан, Португалияга қараганда кўпроқ совринларга эга. Лекин чарчоқ, жароҳатлар, иссиқ ҳаво каби омиллар ҳам бор, – дея қайд этди у.

Роналду Испания терма жамоасига қарши ўйнаш унга маъқуллигини, бу рақобат унга қўшимча руҳий куч беражагини айтди.

– Испанияга қарши ўйнаш менга ёқади. Уларга қарши бир неча бор майдонга тушганман ва бу ўйинлар деярли доим тенг курашда ўтган. Бу сафар ҳам шундай бўлади, деб ўйлайман. Ғалабани майда-чуйда деталларга эътибор қаратган жамоа қўлга киритади. Умид қиламанки, бу Португалия бўлади. Ичимдан шундай ҳис қилаяпман. Лекин барчасини майдон кўрсатади, – деди у.

– Барча португалияликларга қандай мурожаат қилган бўлардингиз? Сизнинг мақомингиз доимий равишда шубҳа остига қўйилаётганига қандай чидам қиласиз?

– Мени 23 йилдан бери «йўқ қилишга» уринишяпти. Лекин танқидчилар бунинг арзимас иш эканини, вақтни бекорга сарфлашлигини англаб етди. Улар уринишади, яна-янга қайтаришади, лекин бундан фойда йўқ, – дея жавоб берди Роналду.

У танқидни футболчининг касбидаги табиий қисм сифатида қабул қилишини таъкидлади.

– Кимгадир танқид ёқади, кимгадир йўқ. Мен бунга кўникканман. Бу ишимнинг бир қисми, – деди у.

Роналду сўзининг якунида португалиялик мухлисларга алоҳида миннатдорлик билдирди.

– Португалияликлар жуда садоқатли халқ. Улар ҳеч қачон йўлдан қайтмайди, биздан юз ўгирмайди. Доим терма жамоа билан, мен билан бирга. Қолган гап-сўзлар – бекорчи нарса, аҳамияти йўқ, – дея таъкидлади Криштиану Роналду.