Simeone: "Barselona"ga qarshi bahsda turli vaziyatlarni boshdan kechiramiz"

"Atletiko" bosh murabbiyi Diego Simeone "Barselona"ga qarshi o‘yin oldidan matbuot anjumanida ishtirok etdi.

- Men klubga kelganimdan buyon muxlislar har yili bir xil munosabatda bo‘lishmoqda. Ular o‘yinlar davomida qo‘shiq aytib, bizga g‘ayritabiiy kuch-quvvat berishdi, stadionning qudrati jamoaga madad bo‘lmoqda.

Ammo ertangi kun final emas, balki yarim final bo‘lib, unda finalda o‘ynash huquqini qo‘lga kiritishimiz mumkin. Bu ajoyib o‘yin ko‘rsatayotgan raqibga qarshi bellashuv.

- Bu jamoa uchun yana yuqoriga ko‘tarilish imkonini beradimi?

- Men faqat o‘z his-tuyg‘ularim haqida gapiryapman: biz juda yaxshi mavsumni o‘tkazyapmiz, jamoa Chempionlar Ligasida ajoyib kurash olib bordi va La Ligada ham shunday qilmoqda. Biz o‘yindan-o‘yinga pasayib ketmayapmiz.

- "Atletiko"ning keyingi bosqichga chiqish imkoniyatiga ishonmayotganlarga nima deysiz?

- Bu hurmatga sazovor fikr.

Bu o‘yinda turli vaziyatlarni boshdan kechiramiz. Raqib ustunlikka ega bo‘ladi va biz o‘tgan o‘yinlarimizni takrorlashga harakat qilamiz. Ikkala tomondan ham katta o‘zgarishlar bo‘ladi deb o‘ylamayman.

- Levandovskining o‘yini haqida fikringiz qanday?

- U mavsumni fantastik ko‘rsatkichlar bilan o‘tkazmoqda. Uning tirishqoqligiga qoyil qolaman, u havas qilsa arziydigan futbolchi va undan o‘rganadigan ko‘p narsa bor.

- Hozirgi vaziyat "Atletiko" uchun birinchi o‘yinga nisbatan o‘zgardimi? Qo‘rquvni qanday boshqarish kerak?

- "Muvaffaqiyatsizlik" - bu biror narsani qilishga urinmaslik, harakat qilgan odam muvaffaqiyatsizlikka uchramaydi.

Men uchun mavsum juda yaxshi kechmoqda, biz Qirol kubogi yarim finaliga chiqdik va har bir o‘yinni o‘tkazganimizdan so‘ng, mavsumning g‘ayrioddiy, yaxshi yoki oddiy bo‘lganini bilib olamiz, - dedi "Atletiko" bosh murabbiyi.

Ma’lumot uchun, "matraschilar" Ispaniya kubogi yarim final javob uchrashuvi doirasida o‘z maydonida "Barselona"ga qarshi bahs olib boradi. Dastlabki to‘qnashuvda jamoalar kuchi teng kelgan edi - 4:4.