TsSKAning Oston O‘runovga qiziqayotgani rostmi? Klub matbuot xizmati futbolchimiz masalasida SPORTS.UZ ga nima dedi?

Kuni kecha O‘zbekiston milliy terma jamoasi a’zosi Oston O‘runovga Moskvaning TsSKA klubi jiddiy qiziqayotgani to‘g‘risida xabarlar paydo bo‘ldi. Bu esa barchaning e’tiborini o‘ziga tortdi.

Rossiya premer-ligasida “Ufa”, “Spartak” va “Ural” singari klublarda to‘p surgan yarim himoyachi o‘tgan yili “Navbahor” sharafini munosib tarzda himoya qildi va ayniqsa Osiyo Chempionlar ligasidagi o‘yinlari yanada katta qiziqishlarga sabab bo‘ldi. Tabiiyki, rossiyaliklar O‘runovni unutishmagandi.

Xo‘sh, TsSKAning Ostonga qiziqib qolgani qanchalik rost? Bu haqiqatga to‘g‘ri keladimi? Ushbu masala yuzasidan surishtiruv o‘tkazishga harakat qildik. Bu borada ayniqsa, TsSKA jamoasining munosabatini bilish biz uchun muhim edi.

Sports.uz jurnalisti Shuhratbek Jo‘raev TsSKA bosh murabbiyi Vladimir Fedotov bilan bog‘lanishga urinib ko‘rdi. Biroq hozirda Vladimir Valentinovich ta’tilda bo‘lgani sababli uni bezovta qilishni istamadi va klub matbuot xizmati rahbari Kirill Breydo bilan bog‘landi.

Oston O‘runovning TsSKA qiziqishlar doirasida emasligini Breydo Sports.uz jurnalistiga ma’lum qilgan holda “bu ma’lumot to‘g‘ri emas”, degan javobni aytdi.

TsSKA O‘runovga qiziqish mavjudligini tan olmadi. Balki unga Rossiyaning boshqa klublari ko‘z tikayotgandir. Futbolchining o‘zi ham yana u erga qaytishga qarshi emas. Katta ehtimol bilan Ostonning yangi klubi Osiyo Kubogi musobaqasidan keyin hal bo‘lsa kerak, agar ungacha biror kutilmagan yangilik chiqib qolmasa...