Xorijlik ekspertlar Husanov transferi tufayli keskin fikrlar bildiryapti
Qishki transferlar oynasining bugungi kundagi haqiqiy qahramoni Abduqodir Husanov bo‘lib turibdi. “Lans”da o‘ynab kelgan legionerimizning 50 million evro evaziga “Manchester Siti”ga o‘tishi juda ko‘plab muxlisu mutaxassislar tomonidan muhokama qilinmoqda.
Xususan, rossiyalik ekspertlar vakili o‘zbek futbolchisining Angliya Premer-ligasiga o‘tishi juda katta voqea ekani, mamlakat selektsionerlar o‘ta iqtidorli o‘yinchini o‘z vaqtida payqay olmaganini ta’kidlamoqda.
Sports.uz portali Rossiya futbolida o‘z nomiga ega mashhur mutaxassislarning Abduqodir Husanov transferiga munosabatini o‘zbekistonlik futbol ishqibozlari e’tiboriga havola etadi.
Valeriy Kechinov, “Paxtakor” va “Spartak Moskva” klublari sobiq futbolchisi:
Abduqodir Husanovning “Manchester Siti”ga transferi tasdiqlangan kun O‘zbekiston uchun olamshumul voqea bo‘ladi.
Chunki o‘zbek futbolchisi Evropaning eng qudratli jamoalarian birida to‘p tepadi.
Yuriy Syomin, taniqli murabbiy:
Husanovning “Manchester Siti”ga transferidan hayratlandi. Rossiya Premer-ligasidan hech kim uning iqtidorini vaqtida payqay olmagan ekan. Hech bir sport direktori yonginamizda voyaga etgan talantni ko‘rmagan. Mana endi u 50 million evro evaziga “Manchester Siti”da o‘ynaydi.
“Lans” atigi 100 ming evroga olgandi. Frantsuzlar qancha ishlab olganini bir o‘ylab ko‘ring! Bu payt bizning jamoalar qaerda edi?
“Spartak”da ko‘p xorijlik mutaxassislar ishladi, ayrimlarining ishi yomon emasdi. Lekin klubda ishlab kelgan barcha sport direktorlariga savolim bor. Sizlar Abduqodir Husanovning Belarusdagi o‘yinlarini kuzatmaganmisiz?
Katta ehtimol bilan e’tibor ham qaratmagansiz. “Spartak” o‘zining moddiy imkoniyatlari bilan ikki yil oldin bu futbolchini 100 ming evroga bemalol xarid qila olardi-ku.
Yuriy Belous, “Lokomotiv Moskva” klubi sobiq vitse-prezidenti:
Bizning klublar Abduqodir Husanovning iqtilorini ko‘ra olmagani selektsiya xizmatlarining darajasi qanday ekanini ko‘rsatib qo‘ydi. Biznikilar uchun Sibirda o‘sgan va “Monako”da natija berayotgan o‘yinchini topishdan, Belarus chempionatidagi iqtidorli o‘yinchini ko‘rishdan Ilichni 25 million evroga sotib olgani osonroq.
O‘zbekistonda rus tilini biladigan odamlar yashaydi. Bizda agar o‘yinchi Qirg‘iziston yoki O‘zbekistondan bo‘lsa, ko‘pchilik uni jiddiy qabul qilmaydi.
Ta’kidlash joizki, 20 yoshli Abduqodir Husanov Evropa yulduzi darajasiga juda tez ko‘tarildi. “Bunyodkor” akademiyasida tarbiyalangan futbolchi professional faoliyatini yurtidan ancha olisdi – Belarus chempionatida boshladi.
“Energetik-BGU” hamyurtimizning iste’dodini to‘g‘ri baholay oldi va unga o‘zini ko‘rsatish uchun imkon berdi. Bu jamoada professional darajada bir yil o‘ynagan Husanovni “Lans” 2023 yilning yozida o‘z safiga qo‘shib oldi.
Endi O‘zbekiston milliy terma jamoasi himoyachisi o‘z mahoratini dunyoning eng nufuzli futbol turniri hisoblangan Angliya Premer-ligasida ko‘rsatishga tayyorgarlik ko‘rmoqda.
Fikrlar